Եթե իրենք վայրկյան շուտ տան հրաժարականը, դա փրկություն է ազգին, ժողովրդին, երկրին. Գագիկ Ծառուկյան

Մենք այսօր ներկայացնում ենք իրականությունը, այսօր հայրենիքի փրկության խնդիրն է դրված, մնացածը կախված է ժողովրդից, իրավիճակից, Ազատության հրապարակում լրագրողների հետ զրույցում ասաց «Բարգավաճ Հայաստան» կուսակցության նախագահ Գագիկ Ծառուկյանը։

«Եթե իրենք վայրկյան շուտ տան հրաժարականը, դա փրկություն է ազգին, ժողովրդին, երկրին», - ասաց Ծառուկյանը։

Նրա խոսքով՝ պետք է վերացնել երկրում առկա լարվածությունը։ «Ցանկացած քաղաքացի թող նստած վերլուծի՝ Ծառուկյանն ինչ ասել ա, իրականություն է եղել։ Երբևիցե քայլ չկատարեցին պատրաստվելու, նախապատրաստվելու, դիրքավորվելու, բանակցելու։ Պատերազմը սկսեց, ասում են՝ դե անակնկալ է մեր համար։ Չորս ամիս է՝ ասել եմ, եթե պատրաստվեին, ոչ պատերազմ կլիներ, ոչ այդքան զոհ կլիներ, ոչ էլ այդպիսի խայտառակ պարտություն։ Մարդկանց խաբելով, սուտ ասելով՝ ման են գալիս, վերջը ինչ է լինելու՝ չգիտեմ», - ասաց Գագիկ Ծառուկյանը։

«Այսօր ինձ մարդիկ մոտեցան, որոնք վարկեր ունեն, չեն կարողանում մարել և ունեցվածքները ձեռքներից տանում են։ Պետությունը պետք է ներում շնորհի այդ վարկերին, որոշ վարկեր էլ սառեցնի, քանի որ տնտեսական ճգնաժամ է։ Պետություն պահողը, տնտեսություն զարգացացնողը ժողվուրդն է, դրա համար ժողովրդին պետք է ձեռք մեկնեն։ Նրանք ի վիճակի չեն, պետք է վայրկյան առաջ հրաժարվեն։ Հակառակ դեպքում օր-օրի ավելի է վատանալու վիճակը։» Գագիկ Ծառուկյանն ընդգծեց, որ հայրենիքի փրկությունը իշխանությունների հրաժարական տալն է․ «Արտագաղթի ճանապարհը մի բռնեք, ամեն ինչն էլ լավ է լինելու» ,-ասաց Գագիկ Ծառուկյանը։