Քաղաքապետարանը տեղեր կառաջարկի, այն մեքենաների համար,որոնք ճանապարհափողոցային հատվածում կանգնած են վաճառքի

Երևանի քաղաքապետարանի աշխատակազմի տրանսպորտի վարչության պետ էդգար Գալստյանն ավագանու նիստում ներկայացրեց 2013-ից 2020 թվականի ընթացքում կազմակերպված ծառայողական ավտոկայանատեղերի շահագործումը շարունակելու իրավունք տալու մասին ավագանու որոշման նախագիծը, որն ընդունվեց:

Գալստյանի խոսքով՝ ավագանու 2013-ից 2020 թվականների որոշումների հիման վրա ծառայողական ավտոկայանատեղեր կազմակերպելու իրավունք ստացած իրավաբանական և ֆիզիկական անձանցից 14-ը դիմել են Երևանի քաղաքապետին նախկինում թույլատրված ծառայողական ավտոկայանատեղերի շահագործումը 2021 թվականից իրավունք ստանալու խնդրանքով:

«Իմ քայլը» խմբակցության անդամ Վահե Գևորգյանը, դիմելով Էդգար Գալստյանին, անդադարձավ էլեկտրոմոբիլների ավտոկայանատեղերի հետ կապված արտոնությունների խնդրին, նշելով, որ քաղաքացիները դժգոհություն են հայտնում, որ իրենց մեքենաները չեն համարվում էլէկտրոմոբիլ և արտոնություն չի տրվում՝ հիմնավորումով, որ մեքենայում առկա է նաև բենզինային շարժիչ. «Միջազգային պրակտիկայում համարվում է էլեկտրոմոբիլ այն մեքենան, որի անիվները գործի է դրվում բացառապես էլեկտրական շարժիչի օգնությամբ, տվյալ քաղաքացիներին մերժվում է այն պատճառաբանությամբ, որ իրենց մեքենաներում առկա է նաև փոքր շարժիչ, որը նախատեսված է լիցքավորելու համար, ոչ թե անիվները պտտելու, ո՞նց ենք մենք դրան վերաբերվում, դա համարում ենք էլէկտրոմոբի՞լ, թե ոչ»:
Գալստյանը նշեց, որ միայն նոր իրավական դրույթ ամրագրելուց հետո, կարող են ներառել նաև տվյալ մեքենաները: Նա հավելեց, որ քաղաքացիներն, քաղաքապետարանի պաշտոնական կայքից կարող են տեղեկանալ, որտե՞ղ կա ծառայողական կայանատեղիներ և այդ ճանապարհահատվածում ավագանու կողմից տրվա՞ծ է արդյոք ծառայողական ավտոկայանատեղի, թե ոչ:

Ավագանու անդամ Արթուր Իսպիրյանն էլ ընդգծեց, որ Երևանի հատկապես կենտրոնական փողոցներում օրինակ՝ Բաղրամյան փողոցում, կայանված են մեծ թվով մեքենաներ վաճառքի կամ վարձակալության համար, որոնք տարածք են զբաղեցնում:

«Հնարավոր չէ՞ զգուշացնել, որ այս քաղաքը մեքենայի վաճառքի տեղ չէ, պետք է տանել այնտեղ, որտեղ հնարավոր է վաճառել կամ վարձով տալ, որովհետև ամիսներով, տարիներով տարածք են զբաղեցնում ու խանգարում են փողոցի մաքրման աշախատանքներին»,- հարցրեց Իսպիրյանը:

Գալստյանը պատասխանեց, որ խնդրի վերաբերյալ օրենսդրական փաթեթը քննարկվել է Ազգային ժողովում. «Այդ մեքենաները խանգարում են նաև ճանապարհային երթևեկությանը, շրջիկ առևտրի կետերի նոր որոշման նման, քաղաքապետարանը տեղեր կառաջարկի, որտեղ կիրականացվի վաճառքը և ճանապարհափողոցային ցանցից ամբողջությամբ դուրս կգան այդ մեքենաները, դա կարճ ժամանակի հարց է»: