Կառավարությունը 80 միլիոն եվրոյի վարկ կվերցնի ՕՊԵԿ-ի հիմնադրամից

Հայաստանի կառավարությունը ՕՊԵԿ-ի Միջազգային զարգացման հիմնադրամից 80 միլիոն եվրոյի վարկ կվերցնի պետական բյուջեի դեֆիցիտի համալրման նպատակով։

Համապատասխան որոշումն ընդունվել է Կառավարության հունիսի 25-ի նիստում։ Կառավարության և հիմնադրամի միջև համապատասխան պայմանավորվածությունը ձեռք էր բերվել ապրիլի 29-ին։ Կառավարությունը, մասնավորապես, կազմել է պետական կառավարման արդյունավետության բարձրացման ծրագիր՝ հարկային եկամուտների հավաքագրման ցուցանիշների աճի և ֆինանսական կայունության նպատակով։

ՕՊԵԿ-ի հիմնադրամից վարկը կտրամադրվի Euribor-ի (միջբանկային վարկավորման եվրոպական դրույքաչափ, որն այս պահին կազմում է 2,606%) 6-ամսյա լողացող դրույքաչափով՝ գումարած 1,56% ֆիքսված դրույքաչափ (ընդհանուր՝ այս պահին տարեկան 4,166%): Վարկի ժամկետը 18 տարի է՝ մայր գումարի 5 տարի արտոնյալ ժամանակահատվածով։