Պատերազմից հետո մարդկանց մեծ արտահոսք չի եղել, քանի որ նախ դրա հնարավորությունը չի եղել. Սինանյան
Սփյուռքի հարցերով գլխավոր հանձնակատար Զարեհ Սինանյանը վերջին օրերին Հայաստանից մեկնողների ու Հայաստան ժամանողների թվերին ծանոթ չէ: Այս մասին նա ասաց այսօր կառավարության նիստից հետո լրագրողների հետ զրույցում՝ հավելելով, որ թվերը գիտեն Միգրացիոն վարչությունում:
Պատերազմից հետո թվերի մասին խոսելով՝ Սինանյանն ասաց, որ թվեր չունեն, սակայն գիտեն, որ մեծ արտահոսք չի եղել, քանի որ նախ դրա հնարավորությունը չի եղել. «Հիմա որ ավիահաղորդակցությունն ավելի կանոնավոր լինի, ավելի ռեալ պատկեր կստանանք»:
Սինանյանը նշեց, որ ներգաղթի ակնկալիք միշտ ունեն, սակայն անուրանալի է, որ հիմա ժողովրդի մեջ որոշ անկում կա՝ կապված բացասական արդյունքի հետ. «Հետևաբար չեմ զարմանա, կամ ավելի շուտ ակնկալում եմ, որ գոնե կարճաժամկետ իմաստով հնարավոր է, որ արտահոսք լինի Հայաստանից»:
