ՏԵՍԱՆՅՈՒԹ. Տղամարդը էլեկտրական մետաղահատ սղոցով փորձել էր կտրել վճարային տերմինալը

Հունվարի 25-ին, ժամը 6-ի սահմաններում, ոստիկանության Բազումի բաժնի քրեական հետախույզները Վանաձոր քաղաքի Ուսանողական փողոցում շրջիկ ծառայություն իրականացնելիս նկատել էին երկու երիտասարդի, որոնք վճարային տերմինալից փորձում էին գողություն անել:

Ոստիկաններին տեսնելով՝ նրանք դիմել էին փախուստի, սակայն իրավապահները հետապնդել էին, բռնել նրանցից մեկին և բերման ենթարկել ոստիկանության Բազումի բաժին։ Պարզվել է, որ բերման ենթարկվածը Վանաձոր քաղաքի Համբարձումյան փողոցի բնակիչ է՝ 30 տարեկան։ Ըստ նրա՝ էլեկտրական մետաղահատ սղոցով փորձել էր կտրել վճարային տերմինալն ու գողանալ դրամապահոցի գումարը: Դեպքի վայրի զննությամբ հայտնաբերվեց էլեկտրական մետաղահատ սղոցը:

Հետագա միջոցառումներով քրեական հետախույզները տեղեկություններ ստացան, որ փախուստի դիմած մյուս անձը Վանաձոր քաղաքի Չերկասի փողոցի 23-ամյա բնակիչ է։ Բացատրական աշխատանքի արդյունքում հունվարի 25-ին, ժամը 22-ի սահմաններում, նա ներկայացավ ոստիկանության Բազումի բաժին և խոստովանեց կատարածը։ Պարզվել է, որ նշված գողության փորձից զատ՝ Վանաձորում կատարել էին նաև 16 գողություն և 2 կողոպուտ։ Հանգամանքները պարզվում են։ Քննությունը շարունակվում է։