Կառավարությունում, ինչ ծրագրի մասին էլ, որ խոսում են, հասկանում ես, որ տակը ծրագիր չկա ընդհանրապես․ Բ․Պիպոյան

Միանշանակ գյուղատնտեսության ոլորտում մեծ կորուստներ ունենք, բայց դա պետք է վերածել թվերի: Այս մասին Tert.am-ի հետ զրույցում ասաց «Իրազեկ և պաշտպանված սպառող» ՀԿ-ի նախագահ Բաբկեն Պիպոյանը` անդրադառնալով գյուղատնտեսության կորած կորուստներին:

«Մենք պետք է հստակ տարանջատենք, թե կորցրած հողերից ի՞նչ բաժին են կազմում այն հողերը, որտեղ անասնակեր էր մշակվում, ի՞նչ ծավալների են պտղատու այգիների կորուստները, ի՞նչ անձնահատուկ խաղողի տեսակներ ունենք, որոնք չենք կարող վերականգնել»,- ասաց նա և նշեց, որ այն կառույցները, որոնք պետք է դա անեին, չեն արել:

«Ժամը ժամի վրա վարելահողեր են փոխվում և Սյունիք տարածաշրջանի որոշ գյուղերի անասնապահության համար վարելահողերն այլևս չեն մշակվելու: Պատկերավոր ասած` եթե բժիշկը տեսնում է, որ հիվանդն ունի գլխացավ, ապա կարող է մեկ օր գլխացավի դեղ տալ, սակայն եթե գլխացավը պարբերաբար է, անընդհատ գլխացավի դեղ տալով կարելի է խորացնել վիճակը, դրա համար պետք է նախ ախտորոշում անել: Որպես պետություն՝ մենք պետք է կարողանանք ճշգրիտ գնահատել մեր կորուստների չափը և դրանց ազդեցության չափը ընդհանուր ոլորտի վրա, որից հետո քայլեր մշակել»,- ասաց նա և նշեց, որ բաներ կլինեն, որոնք կարող ենք փոխարինել, իսկ որոշ բաներ էլ չենք կարող արագ փոխարինել:

Անդրադառնալով էկոնոմիկայի նախարարի հայտարարությանը, որ թռչնամիսը 80 տոկոս թանկանալու է, իսկ Հայաստանը լավ ներդրումային միջավայր է թռչնամիս արտադրելու համար, Բաբկեն Պիպոյանը վստահեցրեց, որ դա իրականության հետ կապ չունի և պարզաբանեց. «Իրականում թանկանում է երրորդ երկրներից ներմուծվող հավի գինը, բայց ԵԱՏՄ երկրներից ներմուծման մեջ գնային փոփոխություն չի լինում»: Նա նաև նշեց, որ այդ հայտարարությունը սխալ հաշվարկի հետևանք է և հանրությանը մոլորության մեջ է գցում:

Բաբկեն Պիպոյանն օրինակ բերեց, թե ինչպես է Ռուսաստանում թռչնամսի շուկան զարգացել և նշեց, որ պետական ծրագրեր են իրականացվել, և եթե մեր տեղական թարմ հավն իր թարմության հաշվին ապահովում է մրցունակություն, ապա սառեցված հավը չի կարողանում ապահովել մրցունակություն:

Խոսելով ընդհանուր գնաճի մասին՝ նա նկատեց, որ ամեն ինչն էլ կարող է թանկանալ: «Արտադրության ծավալերը նվազում են, պահանջարկը մեծանում է և այդ ապրանքները կթանկանան, մինչև այդ բացը լրացվի: Կառավարության քայլերը համահունչ չեն առկա խնդիրների լուծմանը, ինչ ծրագրի մասին էլ, որ խոսում են, հասկանում ես, որ տակը ծրագիր չկա ընդհանրապես»,-ասաց նա:

Բաբկեն Պիպոյանը նկատեց, որ եթե ցանկացած տնտեսության համար նորմալ է մինչև 4% գնաճը, քանի որ դրանով շնչում է պետությունը, սակայն Հայաստանի դեպքում դա սարսափ է, քանի որ այստեղ մարդկանց եկամուտները չեն աճում, առավելևս սպասվում է եկամուտների նվազում: