Տեսանյութում երևացող «Որոտան» ցուցանակը գտնվում է Արցախի Քաշաթաղ շրջանում․Տեղեկատվության ստուգման կենտրոն

Հայաստանյան լրատվամիջոցները, հղում անելով Ararat (@ararathau) տելեգրամյան ալիքի տարածած տեսանյութին, դեկտեմբերի 24-ին գրեցին, որ հակառակորդի տանկերը մտել են Սյունիքի մարզի սահմանամերձ Որոտան համայնք: 

Ամբողջ համացանցը լցված էր տեսանյութով, որտեղ երևում է, թե ինչպես են ադրբեջանական ուժերը տանկով տապալում բնակավայրի ցուցանակը:  

Սակայն տեսանյութում երևացող ցուցանակը հուշում է, որ խոսքը գնում է քաղաք Որոտանի (ադրբեջաներեն Կուբաթլու) մասին, որը գտնվում է Արցախի Քաշաթաղ շրջանում:

Մինչև 1993 թվականը Կուբաթլուն, ըստ Խորհրդային Ադրբեջանի վարչատարածքային բաժանման, համանուն շրջանի վարչական կենտրոնն էր: Առաջին պատերազմից հետո այն հայտնվել էր հայկական վերահսկողության տակ։ Այս տարվա սեպտեմբերի 27-ին Արցախում սկսված լայնածավալ ռազմական գործողությունների ընթացքում քաղաքը անցել է ադրբեջանական վերահսկողության տակ։ 

Հատկանշական է, որ տեսանյութի աղբյուր Տելեգրամի ալիքը հստակ նշում է, որ խոսքը Արցախի տարածքում գտնվող Որոտան քաղաքի մասին է և ոչ թե Սյունիքի մարզի Որոտան համայնքի:
Այս մասին գրում է տեղեկատվության ստուգման կենտրոնը