Կառավարությունը եւ իշխող «Իմ քայլը» դաշինքը անտեսել են ԱԺ-ում սահմանամերձ համայնքների խնդիրների շուրջ քննարկումը. Արման Աբովյան
Դեկտեմբերի 25-ին Ազգային ժողովում «Բարգավաճ Հայաստան» կուսակցության խորհրդարանական խմբակցության նախաձեռնությամբ անցկացվեց աշխատանքային քննարկում, որի ժամանակ քննարկվեցին սահմանամերձ մարզերում գոյություն ունեցող խնդիրները:
«Բարգավաճ Հայաստան» կուսակցության խորհրդարանական խմբակցության քարտուղար Արման Աբովյանի խոսքով՝ քննարկմանը հրավիրվել էին կառավարության անդամներ եւ իշխող «Իմ քայլը» դաշինքի պատգամավորներ, սակայն նրանցից ոչ մեկն այդպես էլ չներկայացավ:
«Ես հուսով եմ, որ իշխող դաշինքը, այնուամենայնիվ, կգա եւ կմասնակցի այս կարեւոր քննարկմանը»,- ասաց Աբովյանը:
ԲՀԿ քարտուղարը հայտնեց, որ քննարկման ժամանակ սահմանամերձ համայնքների ղեկավարների հետ հաստատվելու է հեռախոսային կապ՝ իրավիճակն առավել հստակ հասկանալու համար:
Նշենք, որ քննարկմանը մասնակցել է նաեւ «Լուսավոր Հայաստան» խորհրդարանական խմբակցությունը:
