Ապացույցներ ունենք, որ կան գերեվարված քաղաքացիական անձինք, ովքեր ադրբեջանական բանտում են. Արտակ Բեգլարյան
Այս պահին մեր կատարած աշխատանքներով, մեր արձանագրմամբ 60 քաղաքացիական զոհ կա, որից 39-ը պատերազմական գործողությունների ընթացքում ուղիղ թիրախավորման հետևանքով: Այս մասին մամուլի ասուլիսի ժամանակ հայտարարեց Արցախի ՄԻՊ Արտակ Բեգլարյանը:
«Դեպքերից 21-ն ադրբեջանական կողմի վերահսկողության տակ հայտնված կամ գերեվարման մեջ ընկած քաղաքացիների սպանության դեպքերն են: Հիմնական մասի մարմիններն արդեն վերադարձվել են:
Սա նախնական թիվ է, քանի որ կան տարբեր տվյալներ այլ զոհերի վերաբերյալ, սակայն դրանք ճշգրտման կարիք ունեն:
Այսօր կհրապարակվի այն քաղաքացիական անձանց անուններն ու մահվան հանգամանքները, որոնց մասին հայտնի է»,-ասաց նա:
Բեգլարյանը հավելեց, որ այս պահին 40 անհետ կորած քաղաքացիական անձ կա, որոնց մի մասը տարբեր տեղեկություններով, սպանվել են. «Մի մասով հստակ ապացույցներ ունենք, որ գերեվարված են, ադրբեջանական բանտում են գտնվում»:
