Թուրքական լիրան արժեզրկվել է Անկարայի դեմ պատժամիջոցներից հետո
Երեկ, երբ ամերիկացի կոնգրեսականները համաձայնության են եկել Անկարայի դեմ պատժամիջոցներ կիրառելու հարցում, թուրքական լիրան, որն այս տարի մի քանի անգամ արդեն ռեկորդային անկում է գրանցել, կրկին արժեզրկվել է:
Հիշեցնեմ, որ օրենսդիրներն Ամերիկայի հաջորդ տարվա ռազմական բյուջեի նախագծում դրույթ են ներառել` պարտավորեցնելով ԱՄՆ նախագահին փաստաթղթի ընդունումից հետո 30 օրվա ընթացքում պատժամիջոցներ կիրառել Թուրքիայի նկատմամբ` ռուսական S-400 համակարգերը գնելու համար: Ակնկալվում է, որ նախագիծը օրենքի ուժ կստանա առաջիկա շաբաթներին:
ԱՄՆ նախագահ Դոնալդ Թրամփը, ով ավարտում է լիազորությունները հաջորդ տարվա հունվարին, հայտարարել էր, թե վետո կդնի փաստաթղթի վրա: Այդ դեպքում, սակայն, կսառեցվեն ռազմական ոլորտի բոլոր ծախսերը, այդ թվում՝ աշխատավարձերը, մի բան, որ անցած 60 տարում չի արել ԱՄՆ որևէ նախագահ:
