ՏԵՍԱՆՅՈՒԹ. Արայիկ Հարությունյանն ու Նիկոլ Փաշինյանը քննարկել են առաջիկա անելիքները

ԱՀ նախագահ Արայիկ Հարությունյանի հետ քննարկել ենք առաջիկա անելիքները: Այս մասին ֆեյսբուքյան իր էջում գրել է ՀՀ վարչապետ Նիկոլ Փաշինյանը:

«Պետք է կենտրոնացնենք ուժերն Արցախում բնականոն կյանքը վերականգնելու, մեր հայրենակիցների վերադարձն ապահովելու եւ անհրաժեշտ պայմաններ ստեղծելու համար»:

ՀՀ վարչապետն ընդգծել է, որ անհրաժեշտ է կենտրոնացնել բոլոր ուժերն Արցախում բնականոն կյանքը վերականգնելու, արցախցիների վերադարձն ապահովելու և այդ վերադարձի համար համապատասխան պայմաններ ստեղծելու համար։ Հանդիպման ընթացքում վարչապետ Փաշինյանը հիշեցրել է, որ ՀՀ կառավարությունն արդեն իսկ կայացրել է մի շարք որոշումներ, որոնք վերաբերում են Արցախի մեր հայրենակիցներին ֆինանսական աջակցություն ցուցաբերելուն։ Հիշեցրել է նաև ճանապարհային քարտեզի մասին։ Նա շեշտել է՝ բոլոր հարցերն էլ առաջնային են և պետք է լուծում ստանան։ 


«Կարևոր է զոհված զինծառայողների և քաղաքացիների ընտանիքներին սոցիալական երաշխիքներ ապահովելը, հնարավորինս արագ անհետ կորածների ճակատագրի պարզումը և նրանց ընտանիքների համար սոցիալական երաշխիքների ապահովումը, ինչպես նաև հաշմանդամություն ստացած զինվորների, քաղաքացիների վերականգնման հարցում աջակցելը, նաև սոցիալ-հոգեբանական աշխատանքների իրականացումը»,- ասել է Փաշինյանը։ 

Նա ընդգծել է՝  պատերազմից հետո մեծ ներդրումների կարիք ունի թե՛ Հայաստանը, թե՛ Արցախը։ Անհրաժեշտ է համատեղ աշխատել այդ ներդրումներն ապահովելու ուղղությամբ։ 

ԱՀ նախագահ Արայիկ Հարությունյանը ՀՀ վարչապետին տեղեկացրել է, որ արցախցիների վերադարձը մեծ տեմպով է իրականացվում։ 

«Ըստ մեր հաշվառման կենտրոնի տվյալների՝ միայն 5 օրվա ընթացքում 25.000 բնակիչ է հետ եկել, հոսքը շարունակվում է»,- ասել է նախագահը։ 

Նա նշել է, որ դեռ որոշակի հարցեր կան, որոնք քննարկման կարիք ունեն, մասնավորապես, խոսքը վերաբերում է ճանապարհների անվտանգությանը։ Նա շնորհակալություն է հայտնել ՀՀ կառավարությանն օպերատիվ արձագանքի և բարձրաձայնված խնդիրներին արագ լուծում տալու համար։