Լավրովն Իրանի արտգործնախարարի հետ կքննարկի Ղարաբաղը. Զախարովա
Ռուսաստանի արտգործնախարար Սերգեյ Լավրովը եւ նրա իրանցի գործընկեր Մուհամմեդ Ջավադ Զարիֆը Մոսկվայում կայանալիք հանդիպմանը կքննարկեն Ղարաբաղը, ինչպես նաեւ Համատեղ գործողությունների համապարփակ ծրագրի (ՀԳՀԾ) շուրջ ստեղծված իրավիճակը: Այս մասին շաբաթական ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան:
«Նոյեմբերի 23-ին Իրանի արտգործնախարարության ղեկավարը հերթական այցով կլինի Մոսկվայում, որի ընթացքում նա բանակցություններ կվարի Ռուսաստանի արտգործնախարար Սերգեյ Լավրովի հետ: Ակնկալվում է, որ կշարունակվի կարծիքների փոխանակում միջազգային մի շարք արդիական հարցերի շուրջ, այդ թվում` իրավիճակը Լեռնային Ղարաբաղի տարածաշրջանում, Իրանի միջուկային ծրագրի վերաբերյալ Համատեղ գործողությունների համապարփակ ծրագրի շուրջ, իրավիճակը Սիրիայում, Աֆղանստանում, Պարսից ծոցի գոտում»,- ասել է Զախարովան` նշելով, որ նախարարները կքննարկեն նաեւ երկկողմ օրակարգը:
