ԵՄ առաջնորդները կարող են քննարկել Թուրքիայի դեմ պատժամիջոցները
Գերմանիայի ԱԳ նախարար Հեիկո Մաասը հայտարարել է, որ ԵՄ առաջնորդները դեկտեմբերին կարող են քննարկել Արեւելյան Միջերկրական ծովում Անկարայի գործողությունների պատճառով Թուրքիայի դեմ հնարավոր պատժամիջոցների սահմանման հարցը, հաղորդում է ՌԻԱ Նովոստին:
Ավելի վաղ Եվրամիությունը մեկ տարով (մինչեւ 2021 թվականի նոյեմբերի 12-ը) երկարաձգել է Արեւելյան Միջերկրական ծովում Կիպրոսի տարածքային ջրերում անօրինական հորատման համար անհատական պատժամիջոցների ռեժիմի գործողության ժամկետը:
Աթենքի եւ Անկարայի հարաբերությունները վերջին շրջանում կտրուկ սրվել են։ Սա պայմանավորված է այն հանգամանքով, որ թուրքական Oruc Reis նավը սեյսմիկական հետազոտություններ էր անցկացնում Արեւելյան Միջերկրածովյան այն շրջանում, որը Հունաստանը համարում է իր բացառիկ տնտեսական գոտին։ Հունաստանի Զինված ուժերը բերվել էին բարձր մարտական պատրաստականության։ Թուրքիան հետազոտություններ էր անցկացնում նաեւ այն շրջանում, որը Կիպրոսը համարում է իր բացառիկ տնտեսական գոտին։
Այն բանից հետո, երբ Անկարան Oruc Reis հետազոտական նավը եւ ռազմական նավերը դուրս բերեց Արեւելյան Միջերկրական ծովից, Հունաստանի արտաքին գործերի նախարարությունը սեպտեմբերի 22-ին հայտնեց Թուրքիայի հետ զոնդավորող շփումների վերականգնման շուրջ պայմանավորվելու մասին, որոնք ընդհատվել էին 2016 թվականին, իսկ առաջիկայում անցկացվելու էր շփումների 61-րդ ռաունդը։
