Վարչապետին սպասարկող ինքնաթիռը 250.000 դոլարով չի ներկվել, բայց չեմ կարող այդ թիվը բարձրաձայնել. Աղաջանյան

Օրենքով սահմանված է, որ վարչապետին սպասարկող ինքաթիռը դասվում է այն շարքին, որի մասին տեղեկությունը պետք է լինի գաղտին: Այս մասին այսօր ՔՊ նիստից հետո լրագրողների հետ զրույցում ասաց ՀՀ Կառավարության աշխատակազմի ղեկավար Էդուարդ Աղաջանյանը՝ խոսելով վարչապետ Նիկոլ Փաշինյանի օդանավը ներկելու հետ կապված գումարների վերաբերյալ խոսակցությունների մասին: Փոխանցում է Tert.am-ը: 

Նշենք, որ ըստ մամուլում շրջանառվող տեղեկությունների՝ վարչապետ Նիկոլ Փաշինյանին սպասարկող կառավարական «Airbus A319» ինքնաթիռը ներկելու համար հատկացվել է 250.000 դոլար:

Էդուարդ Աղաջանյանը հերքեց այս տեղեկությունը: «Այդ թիվը չի համապատասխանում իրականությանը, բայց ցավոք, ես չեմ կարող այդ թիվը բարձրաձայնել՝ հաշվի առնելով գաղտնիության չափանիշները»,- ասաց նա և հարցին, թե որն էր առաջնահերթությունը վարչապետի օդանավը վերափոխելու, Աղաջանյանը նշեց, որ խնդիր էր առաջացել և ներկը կիսով չափ ջնջվում էր, թափվում էր:

Նա նշեց, որ այս պահին իրավասու չէ տեղեկացնել, թե ինչ աշխատանքներ են իրականացվել ինքնաթիռի փոփոխության համար: Դիտարկմանը, թե խոսվում էր նոր ինքնաթիռ գնելու մասին, վերջինս արձագանքեց. «Այդ թեման փակեք. ոչ, չէր խոսվում նոր ինքնաթիռ գնելու, ես բազմիցս անդրադարձել եմ այդ թեմային. թեման փակ է»: