Քանաքեռցի Տույի դստեր հարսանիքին մոտ 300 անձ է ներկա եղել

Ինչպես արդեն հայտնել ենք, Dvin Music Hall-ում օգոստոսի 29-ին տեղի էր ունեցել քրեական հեղինակություն համարվող Արթուր Ղազարյանի (Քանաքեռցի Տույ) դստեր հարսանիքը, որի մասնակիցների թիվը մի քանի անգամ գերազանցել էր պարետի որոշմամբ սահմանված թիվը։

«Դվին»-ից ArmDaily.am-ին հայտնել են, որ այս պահին չեն աշխատում, իսկ օգոստոսի 29-ին տեղի ունեցած միջոցառման հետ կապված որևէ տեղեկություն չհայտնեցին։ 

ՍԱՏՄ մամուլի խոսնակ Անուշ Հարությունյանն լրատվականի հետ զրույցում հայտնեց, որ Dvin Music Hall-ի գործունեությունը դեռևս կասեցված չէ, բայց ամբողջ գործողությունն իրականացվել է ՍԱՏՄ-ի հետ համատեղ. «Ոստիկանությունը կասեցրել է 40 հոգուց ավելիի մասնակցությունը, թողել է 40 հոգի, բայց գործունեության կասեցման արձանագրությունը անում ենք մենք, իսկ կասեցման որոշումը կայացնում է պարետատունը՝ այդ թվում կասեցման ժամկետը»։

Հարցին՝ տարածված տեղեկությունը, որ միջոցառմանը մոտ 300 անձ է մասնակցել, համապատասխանո՞ւմ է իրականությանը՝ Հարությունյանը պատասխանեց. «Մոտավորապես մինչև 300 անձ է եղել»։