Միջադեպ վրաց-ադրբեջանական սահմանին
Ադրբեջանա-վրացական սահմանին միջադեպ է տեղի ունեցել վրացական ոստիկանության և Թուրքիայի քաղաքացի Մեթին Արդամինի միջև:
Ըստ թուրքական ԶԼՄ-ների՝ խնդիրը ծագել է 2016-ին Թուրքիայում ռազմական հեղաշրջման կանխման ընթացքում սպանված թուրք զինծառայող Օմար Հալիսդեմիրի և Ադրբեջանի հերոս Մուբարիզ Իբրահիմովի լուսանկարների պատճառով, որոնք փակցված էին Մեթին Արդամինի վարած բեռնատարի հետևի մասում:
Մեթին Արդամինը բեռնատարով աղ էր տեղափոխում Նախիջևանից: Վրացական ոստիկանությունը նրան կանգնեցրել և պահանջել է բեռնատարից պոկել նկարները, բայց վարորդը հրաժարվել է՝ ասելով, որ ինքն ունի հատուկ վկայագիր: Այս մասին գրում է yerkir.am-ը:
Վարորդի և ոստիկանության միջև վեճ է ծագել: Արդահանի ժանդարմերիայի սպաները տեղեկացրել են այդ մասին Վրաստանում Թուրքիայի դեսպանատան հյուպատոսական բաժնին: Բանակցություններից հետո վարորդին թույլ են տվել հատել սահմանը:
