Լոս Անջելեսում ոստիկաններ-ցուցարարներ դիմակայությունը նոր թափ է ստանում

ԱՄՆ Կալիֆոռնիա նահանգի Լոս Անջելես քաղաքում ոստիկանները մահակներ և ռեզինե փամփուշտներ են կիրառել ցուցարարներին ցրելու համար, որոնք իրենց դժգոհությունն են հայտնում աֆրոամերիկացի Ջորջ Ֆլոյդի մահվան առնչությամբ: Այս մասին, ТАСС-ի փոխանցմամբ, հայտնում է CNN հեռուստաալիքը:

Նշվում է, որ ցույցի մասնակիցները տարբեր առարկաներ են նետել իրավապահ մարմինների աշխատակիցների ուղղությամբ: Այրվել է ոստիկանական մեքենաներից մեկը:

CNN-ը ավելի վաղ հաղորդել էր Լոս Անջելեսում անկարգությունների ժամանակ 400-ից 500 մարդու բերման ենթարկելու մասին:

Բևեռլի-Հիլլզ քաղաքում էլ անկարգությունները շարունակվում են։ Օգտատերերից մեկը տեսանյութ է հրապարակել, որտեղ երևում է, թե ինչպես են թալանում Ռոդեո Դրայվ փողոցի վրա գտնվող խանութները։

Հիշեցնենք, որ սևամորթ տղամարդու մահից հետո ԱՄՆ-ի Մինեապոլիս քաղաքում զանգվածային բողոքի ցույցեր և ոստիկանության հետ բախումներ են սկսվել:

Տղամարդու մահը վրա է հասել ոստիկանության կողմից կոպիտ ձերբակալման հետևանքով: Նրանցից մեկը ծնկով սեղմել է ձերբակալվածի կոկորդը, ինչի հետևանքով նա շնչահեղձ է եղել:

Ոստիկաններն օգտագործել են արցունքաբեր գազ: Ցուցարարները երեկ գրոհել էին թիվ 3 բաժանմունքի վրա, որում ծառայել են արդեն հեռացված ոստիկանները: