100 մլն դրամ է հատկացվել դիտահորերի, դրանց թուջե կափարիչների և անձրևորսիչների վերանորոգման համար. Հակոբ Կարապետյան

Երևանի քաղաքապետարանի մամուլի խոսնակ Հակոբ Կարապետյանը ֆեյսբուքյան գրառում է կատարել՝ նշելով, որ դիտահորերի, դրանց թուջե կափարիչների և անձրևորսիչների վերանորոգման համար հատկացվել է 100 մլն դրամ: Կարապետյանը նշել է, որ դիտահորերը ճանապարհների վերանորոգման ընթացքում կհավասարեցվեն ասֆալտի մակերևույթին:

«Ասֆալտապատման աշխատանքների ընթացքում այս տարի առանձին ուշադրության կարժանանան ճանապարհի վրա անհարթություն առաջացնող դիտահորերը: 100 միլիոն դրամ է հատկացված Երևանի 2020-ի բյուջեում՝ դիտահորերի, դրանց թուջե կափարիչների և անձրևորսիչների վերանորոգմանը:

Ճանապարհի մակերևույթից ցածր կամ բարձր նիշի վրա գտնվող դիտահորերն այսօր երթևեկության համար խոչընդոտ են դառնում՝ երբեմն վթարային վիճակ ստեղծելով կամ վնասելով մեքենաները: Դրանք հիմա՝ ճանապարհների վերանորոգման ընթացքում կհավասարեցվեն ասֆալտի մակերևույթին:

Դիտահորերի խնամքի համար, ըստ էության, պատասխանատու են ջրմուղ-կոյուղու կամ կապի համապատասխան կազմակերպությունները, բայց քանի որ տարիներ շարունակ գործող կարգավորումներով խնդիրը չի լուծվում, քաղաքապետ Հայկ Մարությանի հանձնարարությամբ, կամավոր լիազորությունը ստանձնել է համայնքը»:

[e7ee715f9bfa651488eec0aa3a5bd46d.png]