Զինծառայողի կողմից սպանված երիտասարդը ընտանիքի միակ արու զավակն էր․ մարնամասներ
Ինչպես արդեն հայտնել ենք, երեկ Տավուշի մարզում սպանություն է տեղի ունեցել, կան նաև վիրավորներ: Մահացածը Տավուշի մարզի Բերդ քաղաքի Այգեձոր բնակավայրի բնակիչ, 23-ամյա Բորիս Ալիփյանն էր, իսկ վիրավորներն են՝ Տավուշի մարզի Բերդ համայնքի Այգեձոր բնակավայրի բնակիչ, 21-ամյա Սարգիս Բաբայանն ու Դավիթ Ծաղկյանը: ArmDaily.am-ի տեղեկություններով դեպքը տեղի է ունեցել Արծվաբերդ գյուղում: Երիտասարդները գնացել են «ռազբորկա» անելու: Երկու կողմում էլ մեծ թվով երիտասարդներ են եղել, մասնակիցների թիվը չի սահմանափակվել 4-ով:: Սակայն վեճը վերածվել է քաշքշուկի և ավարտվել ծեծկռտուքով ու դանակահարությամբ:
Մեր աղբյուր փոխանցմամբ մահացած երիտասարդը՝ Բորիս Ալիփյանը, կռվի անմիջական մասնակիցներից չի եղել ու որևէ կապ չի ունեցել թեմայի հետ, նրան ընկերներն են գնացել խնդրել, որ գնա իրենց հետ: Նա ամուսնացած չէր, բանակ չէր գնացել, քանի որ փոքր ժամանակ իր հետ դեպք էր տեղի ունեցել, որը վնասել էր առողջությանը: Համագյուղացիները նրան բնութագրում են որպես համեստ և հավասարակշռված երիտասարդ:
Նշենք, որ Բորիսը ընտանիքի միակ տղան էր, նա ունի 2 քույր:
Հիշեցնենք, որ Տավուշի մարզի ոստիկաններն ու քննիչները նշված սպանությունը կատարելու կասկածանքով հայտնաբերել և ոստիկանության Բերդի բաժին են բերման ենթարկել մի երիտասարդի, ով ծառայում է ՀՀ ՊՆ N զորամասում՝ որպես պայմանագրային զինծառայող:
