Ավանդների փոխհատուցումը վերսկսվել է․ 1935-36 թթ․ ծնված ավանդատուներին տրամադրվում է նաև 40% փոխհատուցում

Խորհրդային բանկերում ներդրած ավանդների փոխհատուցումը հունվարից վերսկսվել է։ Այս տարի խնայողությունները ստանալու իրավունք ունեն 1935 և 1936 թվականներին ծնված քաղաքացիները, որոնք մինչև 1993 թվականի հունիսի 10-ը ներառյալ ավանդներ են ունեցել նախկին «Խնայբանկի» մասնաճյուղերում:  Այս արտոնյալ խմբերից բացի, այս տարի իրենց խնայողություններն արտահերթ ստանալու իրավունք են ստացել մարտական գործողությունների հետևանքով չօգտագործվող հողատարածքների, գնդակոծման տակ գտնվող սահմանամերձ համայնքների այն  ավանդառուները, որոնք 2014թ. օգոստոսի 1-ի դրությամբ հաշվառված են տվյալ համայնքում։ Այս կետը Շիրակի մարզին չի վերաբերում։ Վերսկսված փաստաթղթավորման համար սոցիալական աջակցության կենտրոնները դիմում են 1935-36 թվականներին ծնված   քաղաքացիներին։ 
Իսմենդ Նազարեթյանը ծնվել է 1936 թվականին, Գյումրիում: Այս անունով նրան ոչ ոք չի ճանաչում, շրջապատում 84-ամյա պապին գիտեն Միշա անունով: 15 տարեկանից քաղաքի գործարաններում է աշխատել, ասում է՝ արդյունաբերական քաղաքում այդ տարիներին անգործ մարդ չկար։ 
Ամսական աշխատավարձով կարողացել է լավ ապրել ու մի քիչ էլ խնայել։ Ամեն ամիս «Խնայբանկում» բացված ավանդին որոշակի գումար էր ավելացնում`նեղ օրվա համար: 

Արդեն չի հիշում, թե ինչքան գումար կա հավաքված խորհրդային գրքույկում։ Դեռ չի հետաքրքրվել, թե տարիների վաստակի խնայողությունների դիմաց փոխհատուցումը որքան է կազմելու։ Փաստաթղթերը նոր է ներկայացրել Գյումրիի սոցիալական աջակցության տարածքային կենտրոն։ 

«2020 թվականի հունվարից սկսած 10 ընտանիք կամ 10 անձ է դիմել սոցծառայություն, և հիմա կառավարության նոր որոշմամբ՝ ավանդները տրվում են մինչև 1936 թվականի դեկտեմբերի 31-ը ծնվածներին»,- պարզաբանում է սոցիալական աջակցության «Գյումրի-1» տարածքային ծառայության տնօրեն Արտաշես Եգորյանը:  Այս տարի ավանդների փոխհատուցում ստանալու իրավունք ունեն 1935 և 1936 թվականներին ծնված քաղաքացիները, բայց կան  դիմումատուներ, որոնք նախորդ տարիներին ծրագրից դուրս են մնացել։  «Ունենք նման դեպքեր, որ հանրապետությունից բացակայել են, ՌԴ-ում են եղել կամ մեկ այլ պատճառով բացակայել են, հիմա գալիս են, նորից դիմում են և, ասենք, 1932 կամ 1934 թվականների ծնվածները, 1935-36 թվականների հետ մեկտեղ, ստանում են իրենց գումարները»,-ասում է Արտաշես Եգորյանը: 
 

Եթե քաղաքացին կորցրել է կամ չի պահպանել իր ավանդային գրքույկը, այս դեպքում «Հայխնայբանկի» իրավահաջորդ «ՎՏԲ» բանկից պարտադիր պահանջվում է տեղեկանք, որը կհաստատի ներդրված ավանդի չափը։ 
«Պետք է դիմել բանկ և պահանջել տեղեկանքը, տեղեկանքի մեջ երևում է, թե ինչքան գումար է եղել գրքույկում, և էստեղ նաև կա 40 տոկոս փոխհատուցում. շատ ժամանակ տարեցները տեղյակ չեն, որ իրենց ունեցած գումարի վրա տարիների ընթացքում կուտակվել է էս փոխհատուցումը, իսկ տեղեկանքով սա պարզ երևում է։ Փոխհատուցման գումարը նույնպես գումարվում է ունեցած մայր գումարին և վճարվում»,- նշում է «Գյումրի 1» սոցիալական աջակցության տարածքային ծառայության առաջին կարգի մասնագետ Աիդա Խաչատրյանը: 

Հավելյալ փոխհատուցում ասածը վերաբերում է մարդկանց հայտնի գորբաչովյան 40 տոկոսին, որը ոչ բոլորի խնայողական գրքույկներում է  նշված եղել։ Ըստ ներկայացված տեղեկանքի՝ քաղաքացիները կարող են ստանալ նաև մահացած ամուսնու կամ կնոջ ավանդային խնայողությունը, այս դեպքում կվճարվի գումարի միայն 50 տոկոսը: 

«Կարգը նորից պահպանվում է, եթե կինը մահացած է, բայց ամուսինը 35 կամ 36 թվի ծնված է, նա կարող է ստանալ նաև իր կնոջ  գրքույկում եղած գումարի 50 տոկոսը, և հակառակը»,-ասում է Արտաշես Եգորյանը։  Իսկ այն քաղաքացիները, ովքեր արդեն ընդգրկվել են վճարման ցուցակներում, բայց մահացել են, այս դեպքում գումարն ամբողջությամբ տրվում է օրինական ժառանգներին: Մինչ այս ներկայացված փաստաթղթերում մեծ կարողություններ ունեցող տարեցներ դեռ չեն եղել: Ամենաշատը 10-15 հազար ռուբլի ավանդային գումար է։ Հաշվի առնելով ավանդառուների տարիքային շեմը՝ շատ հաճախ անհրաժեշտ է լինում սոցիալական աշխատողներին այցելել նրանց տներ։ Տարեցների փոխարեն փաստաթղթերը կարող են ներկայացնել նաև վստահված անձինք: