Սիսիանում «Այո»-ի քարոզարշավի ժամանակ ՀՀ վարչապետ Նիկոլ Փաշինյանն անդրադարձավ դիտարկմանը, թե եթե այդքան շատ դրական փոփոխություններ են եղել երկրում, ավելացել են սոցիալական ծախսերը, աշխատավարձերը, ինչու մարդիկ իրենց կաշվի վրա դա չեն զգում:

«Նախ զգում են մարդիկ, բայց ես ուզում եմ այս վիճակը համեմատենք գլխացավ ունեցող մարդու վիճակի հետ: Երբ դուք գլխացավի դեղ եք խմում, ձեր գլխացավը միանգամից է անցնո՞ւմ: Լինում է, որ տեւում է 15 րոպե, լինում է, որ տեւում է 30 րոպե, լինում է այնպես, որ անհրաժեշտ է երկրորդ հաբը խմել:

Հիմա Հայաստանն այն վիճակում է, որ գլխացավի դեղը խմել ենք, բայց այդ ցավը անցնելու պրոցեսի մեջ է: Չկասկածեք, որ ցավն անցնելու է: Թույլ չտաք, որ էդ «ոչիստներն» իրենց կեղծիքներով, իրենց կեղծիքներով ինչ ասես տարածում են իմ, իմ ընտանիքի, կառավարության բարձրաստիճան ներկայացուցիչների մասին, ճոխությունների մասին»,-ասաց նա:

Սիսիանցիներից մեկի խորհրդին, որ արհամարհել է պետք նրանց ասածը, Փաշինյանն արձագանքեց. «Ես արհամարհում եմ, ուզում եմ՝ դուք էլ արհամարհեք: Նախկին քաղաքական համակարգին ձեռք էր տալիս, որ քաղաքացին լինի խեղճ, որովհետեւ ինչքան խեղճ, էնքան լավ: Որովհետեւ եթե մարդը 5 հազար կամ 10 հազար դրամ տեսնելիս չի զարմանում, ինքը ընտրակաշառքով չի քվեարկի»: