Տասնյակ պաղեստինցիներ են վիրավորվել իսրայելական բանակի հետ բախումների հետևանքով
Առնվազն 48 պաղեստինցի է տուժել ուրբաթ օրը Հորդանանի արևմտյան ափին իսրայելական բանակի հետ բախումների ժամանակ: Այս մասին հայտնում է Sky News - Arabia-ն՝ վկայակոչելով Պաղեստինի Կարմիր մահիկի միությանը:
Ուրբաթօրյա աղոթքներից հետո հարյուրավոր պաղեստինցիներ բողոքի երթի դուրս եկան, այսպես կոչված, դարի գործարքի դեմ: Դարի գործարքը պլան է պաղեստինա-իսրայելական խաղաղ կարգավորման մասին, որի մասին անցյալ երեքշաբթի օրը հայտարարեց ԱՄՆ նախագահ Դոնալդ Թրամփը` Իսրայելի վարչապետ Բենյամին Նեթանյահուի հետ միասին:
Լրատվականի տվյալներով, զինվորականները օգտագործում են արցունքաբեր գազ և ռետինե փամփուշտներ: Բախումների արդյունքում կան վիրավորներ, որոնք տեղափոխվել են հիվանդանոց: Ձերբակալվածներ ևս կան:
