Հայաստանում նախորդ տարի մաքսային ձևակերպում է ստացել 189 հազար 18 մեքենա, դրա արդյունքում պետական բյուջե է ապահովվել 95 մլրդ դրամի մուտք:

«Արմենպրես»-ի հաղորդմամբ՝ այս մասին հրավիրված ասուլիսում հայտնեց ՊԵԿ նախագահ Դավիթ Անանյանը:

«2019-ի ընթացքում մաքսային ձևակերպում է ստացել 189 հազար 18 ավտոմեքենա՝ նախորդ տարվա՝ 64 հազար 82-ի համեմատ: Մեքենաների համար գանձումների գծով պետական բյուջեի եկամուտները կազմել են շուրջ 95 մլրդ կամ 58 մլրդ-ով ավել 2018-ի համեմատ»,-ասաց Անանյանը:

Նա անդրադարձավ նաև ընդդիմախոսների այն մտահոգությանը, որ 2020-ին ավտոմեքենաների աննախադեպ ներհոսք չի լինելու, և  ինչով են պատրաստվում կատարել բյուջետային մուտքերի գծով ծրագրավորված ցուցանիշները: Անանյանը նշեց՝ 2019-ին հարկ վճարողներին 56.4 մլրդ դրամի դեբետային մնացորդները վերադարձնելու որոշումը նաև նպատակ ուներ չեզոքացնելու այն եկամտային ժամանակավոր էֆեկտը, որ ունեցել են 2019-ին ավտոմեքենաների մասով: «Ընդդիմախոսների կողմից արտահայտված այն մտահոգությունը, թե ավտոմեքենաների գծով մուտքերը եղել են ժամանակ եկամուտներ, տեղին են, բայց մենք այդ ժամանակավոր եկամուտների ազդեցության անբարենպաստ հետևանքը չեզոքացրել ենք: Հետևաբար, 2020-ին ունենալու ենք բյուջետային եկամուտներ՝ մեր պատկերացմամբ շատ ավելի, քան ծրագրավորված է 2020 թվականի պետական բյուջեի մասին օրենքով»,-վստահեցրեց Անանյանը: