«Ես համարում եմ, որ կարևոր է իմանալ»․ Ալեքսանդր Լապշին

ՌԴ և Իսարյելի քաղաքացի, բլոգեր Ալեքսանդր Լապշինը ֆեյսբուքյան իր էջում գրել է․ «Այժմ պաշտոնական է. Իսրայելը համարում է, որ Լեռնային Ղարաբաղ մեկնելու համար Ադրբեջանում  ինձ տրված պատժաչափը  չի համապատասխանել օրենքին: Իսրայելի գլխավոր դատախազությունը և Երուսաղեմի ոստիկանության բաժինը քննեցին Ադրբեջանի դատարանի վճիռը և որոշեցին, որ դատավճիռը չի համապատասխանում Իսրայելական օրենսդրությանը և չի կարող մուտքագրվել քաղաքացու անձնական գործի մեջ: Ես համարում եմ, որ կարևոր է իմանալ»:

Հիշեցնենք՝  Ալեքսանդր Լապշինը, որը բնակվում էր Մոսկվայում և վարում է հեղինակավոր Travel Blog-ը, ձերբակալվել էր 2016 թվականի դեկտեմբերի 15-ին Մինսկում:

2011 թվականի ապրիլին, 2012 թվականի հոկտեմբերին և 2016 թվականի հունիսին Լապշինն այցելել էր Արցախ և այդ մասին գրել իր բլոգում՝ քննադատելով Ադրբեջանի քաղաքականությունը, ինչի համար Ադրբեջանի իշխանությունները նրա նկատմամբ քրեական գործ էին հարուցել և հետախուզում հայտարարել՝ Ադրբեջանի պետական սահմանն անօրինական հատելու մեղադրանքով: Ադրբեջանը դիմել է Բելառուսին՝ Լապշինին արտահանձնելու պահանջով: Բելառուսն էլ բավարարել էր գործընկեր երկրի պահաջն ու 2017թ.-ի փետրվարի 7-ին Լապշինին արտահանձնել Բաքվին: