Արցախի անվտանգությունը ենթակա չէ զիջման. Աննա Նաղդալյան

ՀՀ ԱԳՆ մամուլի խոսնակ Աննա Նաղդալյանն այսօրվա մամուլի ասուլիսի ժամանակ հայտնել է, որ Արցախյան հակամարտության առումով ՀՀ դիրքորոշումը հստակ ներկայացված է, և նախարար Զոհրաբ Մնացականյանը նշել է, որ մեր նպատակը Արցախի ժողովրդի ազատ ինքնորոշման իրականացումն է: Այն բոլոր առաջարկները, որոնք չեն ապահովում Արցախի ժողովրդի ինքնորոշման անվտանգությունը, չեն կարող ընդունելի լինել ՀՀ-ի համար:

«Արցախի անվտանգությունը ենթակա չէ զիջման»,- ասել է ՀՀ ԱԳՆ մամուլի խոսնակը:

«Արցախյան հակամարտության բանակցային գործընթացում հայկական կողմի համար վստահության ամրապնդման և ռիսկերի նվազեցման քայլերը առաջնային են: Դեկտեմբերի սկզբին Բրատիսլավայում տեղի ունեցած Հայաստանի և Ադրբեջանի ԱԳ նախարարների հանդիպումը այդ առումով կարևոր քայլ էր, և ունենք ռիսկերի ավելի նվազ մակարդակ»,- նշել է Նաղդալյանը:

Ասուլիսի ժամանակ Աննա Նաղդալյանը անդրադարձավ նաև ԱՄՆ Սենատի կողմից Հայոց ցեղասպանության բանաձևի  ճանաչման էական նշանակությանը, ասելով, որ Սենատի կողմից Հայոց ցողասպանության բանաձևի ընդունումը մեծ նշանակություն ունի ցեղասպանությունների կանխարգելման առումով, և այդ որոշումը ոչ միայն ոգևորող է, այլև արդիական:

Աննա Նաղդալյանը ԱԳՆ-ի անունից շնորհակալություն է հայտնել Սենատի անդամներին և ամերիկահայ համայնքի ակտիվ անդամներին: