Նաիրա Զոհրաբյանը քննարկել է ՄԻԵԴ-ում Հայաստանի դեմ ուղղված բողոքները
Այսօր Մարդու իրավունքների պաշտպանության հանձնաժողովում Մարդու Իրավունքների Եվրոպական դատարանում Հայաստանի ներկայացուցիչ Եղիշե Կիրակոսյանի հետ քննարկվել են ՄԻԵԴ-ում Հայաստանի դեմ ուղղված բողոքները: Այս մասին հայտնում է հանձնաժողովի նախագահ Նաիրա Զոհրաբյանը:
«Եվրոպական դատարանի համար Թալիշում Խալափյանների ընտանիքի անմարդկային խոշտանգումը բավարար հիմք չէ՞
Փաստորեն, Հայաստանի դատակական եռաստիճան համակարգի կայացրած խայտառակ վճիռների պատճառով Հայաստանը պետական բյուջեից մինչ օրս վճարել է 3 միլիոն դոլարից ավելի գումար, որոնց զգալի մասը Հյուսիսային պողոտայի խուլիգան ավանտյուրայի պատճառով, երբ մարդկանց դուրս շպրտեցին իրենց տներից ու գրոշների փոխհատուցում տվեցին: Մենք քննարկելու ենք օրենսդրորեն այս խնդիրը կարգավորելու հարցը, որպեսզի տարբեր հանցագործ պաշտոնյաների անօրինականությունների պատճառով չվճարի պետությունը` հարկատուների հաշվին:
Բնականաբար, քննարկեցինք նաև ապրիլյան պատերազմի ժամանակ ադրբեջանական հրոսակների կողմից հայ զինվորների և խախաղ բնակչության խոշտանգումների հարցը, որոնցից մի քանիսը այս պահին Եվրոպական դատարանի քննության տիրույթում են:
Մի բան, սակայն, հասկանալի չէ, թե էդ ո՞ր չափորոշիչներով է Մարդու Իրավունքների Եվրոպական դատարանը Թալիշում, Խալափյանների ընտանիքի անմարդկային խոշտանգումը, ծեր մարդկանց անարգումը, համարել ոչ բավարար ապացույց` ազերի ահաբեկիչների դեմ վարույթ սկսելու համար: Սրանք հարցեր են, ինչպես նաև Գուրգեն Մարգարյանին կացնահարած անասուն Սաֆարովի հարցը, որի վերաբերյալ առաջիկայում կլինի ՄԻԵԴ-ի որոշումը, որ ամեն օր ու ժամ պիտի լինեն մեր աշխատանքային օրակարգում»,- իր ֆեյսբուքյան էջում գրել է պատգամավորը:
