2019 թվականի 9 ամիսների արդյունքներով Հայաստանի տնտեսական աճի ցուցանիշը 7,5 տոկոս է։ Եվ այս արդյունքով Հայաստանը բացարձակ առաջատար է ԵԱՏՄ, հետխորհրդային տարածաշրջանում։ Այս մասին այսօր Ազգային ժողովում հայտարարեց Նիկոլ Փաշինյանը։

Նա նաև ասաց, որ շուտով ի հայտ կգան նաև եվրոպական երկրների ցուցանիշները, և հնարավոր կլինի Հայաստանի ցուցանիշը համեմատել նրանց հետ։

Փաշինյանը նաև որոշ թվեր ներկայացրեց կոնկրետ ոլորտների աճի ցուցանիշներից․

Արդյունաբերություն – 8,8 տոկոս,

Մշակող արդյունաբերություն – 9,3 տոկոս,

Շինարարություն – 4,5 տոկոս,

Ծառայություններ – 15,1 տոկոս,

Առևտրի շրջանառություն – 8,9 տոկոս,

Արտահանում – 7,2 տոկոս,

Աշխատավարձերի աճ – 5,9 տոկոս։

«Ես ուզում եմ արձանագրել, որ սրանք ոչ թե լավ, այլ շատ լավ ցուցանիշներ են: Հայաստանի բյուջեի եկամուտները 1,5 տարվա ընթացքում աճել են 353 միլիարդ դրամով։ Բայց սա իշխանություններին չի բավարարում, նրանք ավելի շատ են ուզում», – ասաց Փաշինյանը:

Նա պատկերավոր բացատրեց, որ եթե «զարգացման սանդուղքն» ունի 100 աստիճան, ապա այն պետք է անցնել 1-2-3-4 և այլն։ 
«Լավ, կարանք լոնքերով 2-2 թռնենք, 3-3 թռնենք, հիմա մենք 4-4 ենք թռնում։ Մեր ընդդիմադիրներն ասում են՝ չէ՜, էս ո՞նց եք 4 թռնում, 12 թռեք միանգամից։ Չի կարող ընդհանրապես լինել այդպիսի բան։ Ընդհանրապես որևէ մեկը չի կարող անել այդպիսի բան», – ասաց Փաշինյանը։ 

Նա ասաց, որ իրենց ամեն դեպքում դուր է գալիս դա, և եթե ընդդիմությունը «դուխ տա», իրենք կթռնեն այդքան։