Նախկին գլխավոր դատախազ Գևորգ Կոստանյանին տրված 48  ժամը ողջամիտ ժամկետ էր վարույթ իրականացնող մարմնին ներկայանալու համար, սակայն նա հայտարարեց, որ մտադրություն չունի գալու:

 Այս մասին այսօր՝ նոյեմբերի 29-ին, լրագրողների հետ զրույցում ասաց ԱԺ «Իմ քայլը» խմբակցության պատգամավոր Անդրանիկ Քոչարյանը։

«Նախկինում ՀՀ գլխավոր դատախազի պաշտոնը զբաղեցնող անձնավորությունը, երբ արհամարհում է պետության կարևորագույն ինստիտուտներից մեկի որոշումը, զարմանում եմ, թե այդ անձնավորությունն ինչպես է ղեկավարել Գլխավոր դատախազությունը: Չեմ հասկանում՝ ժամանակին ինքը ինչպե՞ս էր վերահսկում քրեական գործերը։ Երևի այնպես, ինչպես ինքը վերաբերվում է այս քրեական գործին, որը շատ կարևոր է մեր պետության համար» ,- նշեց նա։

Քոչարյանը ենթադրում է՝ Կոստանյանը չի գալիս, որովհետև «գիտի քրգործում իրեն վերաբերող նյութի ծավալը և մեղադրանքի բովանդակությունը։

Պտագամավորը նաև կարծում է, որ երեկ պայթյունի հետևանքով մահացած Երևանի նախկին ոստիկանապետ Աշոտ Կարապետանը կարող էր «Մարտի 1»-ի գործով  կարևոր վկայություն տալ, եթե «Մարտի 1»-ի դատաքննությունը սկսվեր․  «Բայց ինքներդ էլ տեսնում եք, որ Ռոբերտ Քոչարյանի և նրա փաստաբանական խմբի տակտիկական քայլերը բերում են նրան, որ դատաքննությունը, որքան հնարավոր է, հետաձգեն: 

Որքան հետաձգեն՝ այնքան կարևոր տարրեր են պակասում  այդ քրեական գործի տիրույթից։ Այս առումով, իհարկե, ափսոսանք կա Աշոտ Կարապետյանի մահվան հետ կապված, յուրաքանչյուր մարդկային կյանքի կորուստ ցավալի է: Ինքս օր առաջ կոչ եմ արել դատավորին, որպեսզի գտնի հնարավորություն՝ դատաքննական պրոցեսն արագ սկսելու համար»։

Տեսանյութը News.am-ի: