ՏԵՍԱՆՅՈՒԹ. Պայթյուն, զոհեր, հարյուրավոր վիրավորներ և պարետային ժամ. Կոլումբիայում բողոքի ցույցեր են

Անկարգությունների վերսկսումից հետո Կոլումբիայի մայրաքաղաք Բոգոտայի տարածքում իշխանությունները պարետային ժամ են սահմանել։ Այս մասին հայտնում է City TV-ն։ Բոգոտայում քաղաքային արագընթաց ավտոբուսների համակարգի աշխատանքը դադարեցվել է։ 
Քաղաքապետարանի տվյալներով՝ ձերբակալվել է 230 մարդ՝ հասարակական կարգի խախտման, թալանի և վանդալիզմի համար։ 
Պաշտոնական տեղեկություններով՝ հակակառավարական ցույցերի ընթացքում զոհվել է 3, վիրավորվել 273 մարդ, այդ թվում 148 զինվորական և 3 ոստիկան։ 

Կոլումբիայի Կաուկա դեպարտամենտում նորաբաց ոստիկանական բաժանմունքի մոտ բեռնատար մեքենա է պայթել, ինչի պատճառով զոհվել է 3 մարդ։ Բեռնատարը լիցքավորված է եղել հենց պայթուցիկ սարքով։ Այս մասին հայտնում է տեղական մամուլը։ 
Պայթյունի հարվածային ալիքի հետևանքով ցնցվել են նաև մոտակա տները, իսկ բնակավայրում էլեկտրամատակարարումն անջատվել է։ 

Տեղի իշխանությունները չեն բացառում ահաբեկչության վարկածը, սակայն փոքր-ինչ անսովոր մոտիվացիայով։ Ենթադրվում է, որ պայթյունը կազմակերպել են հանցավոր խմբավորումները՝ օգտվելով Կոլումբիայում տիրող խառը իրավիճակից։ Նրանց նպատակը, ըստ իրավապահների, կարող էր լինել ընդհանուր վախի մթնոլորտի տարածումը։