Շատ բացասական եմ գնահատում նախարարի պահվածքը, խոսում է՝ առանց դիմացինին լսելու: Այս մասին Tert.am-ի հետ զրույցում ասել է ԵՊՀ հայոց լեզվի ամբիոնի դասախոս,  պրոֆեսոր Ռուբեն Սաքապետոյանը` անդրադառնալով ԿԳՄՍ նախարար Արայիկ Հարությունյանի և դասախոսների հանդիպմանը, ինչպես նաև հայագիտական առարկաները բուհերում ոչ պարտադիր դարձնելու մասին օրինագծում տեղ գտած դրույթներին:

«Սաղաթելյան Ռիտան հարց է տալիս, թե արդյոք ունեն փաստեր, որ հայոց լեզվի մասնագետները թաթախված են կոռուպցիայի մեջ` ինչպես հայտարարում են, նախարարը պատասխանում է` Ձեր եղբոր տղայի կուսակցությանը մենք կուղարկենք արկղերով տվյալներ, ի՞նչ կապ ունի եղբայրը»,-ասաց նա և նախարարի պատասխաններն անլուրջ գնահատեց: 

«Բոլոր մասնագետները վիրավորված են, որովհետև հարցը նենգափոխվում է, ստացվում է, որ մարդիկ իրենց տեղերի, ժամերի մասին են մտածում, մինչդեռ հայտնի է, որ այդ հայագիտական առարկաներն աշխարհայացք ձևավորող առարկաներ են, և դրանք պետք են ոչ միայն հայագետներին, այլ նաև առհասարակ բոլոր ուսանողներին»,-ասաց նա: Ինչ վերաբերում է նախարարի հրաժարականի պահանջին, ապա Ռուբեն Սաքապետոյանը նշեց, որ այդ հարցերն իրեն չեն հետաքրքրում, քանի որ քաղաքական հարցեր են: «Ես գիտեմ, որ եթե սույն պարոնին հեռացնեն, իր տեղը իր նման ուրիշն է գալու, այնտեղ նորմալ մարդ չի կարող գալ»,-ասաց նա և նկատեց, որ երբ մասնագետները խոսում են, ուշադրություն դարձնող չկա, և բոլոր մասնագետները հիասթափված են նախարարի մոտեցումներից:

Մանրամասները` սկզբնաղբյուր կայքում