ՏԵՍԱՆՅՈՒԹ. ԱԻՆ-ում մեկ րոպե լռությամբ հարգել են զոհված փրկարար Սամվել Դևելյանի հիշատակը
Նոյեմբերի 1-ին ՀՀ Արտակարգ իրավիճակների նախարարությունում անցկացվել է Փրկարար ծառայության ամենշաբաթյա ընդլայնված հերթական խորհրդակցությունը, որը վարել է ծառայության տնօրենի պաշտոնակատար, փ/ծ գեներալ-մայոր Վրեժ Գաբրիելյանը: Այս մասին տեղեկացնում են ԱԻՆ լրատվականից:
Խորհրդակցությունը սկսելուց առաջ աշխատակիցները մեկ րոպե լռությամբ հարգել են Լոռու մարզում հրդեհաշիջման աշխատանքներ իրականացնելիս զոհված հրշեջ-փրկարար Սամվել Դևելյանի հիշատակը:
Փրկարար ծառայության տարբեր ստորաբաժանումների ղեկավարները, Երևան քաղաքի և մարզային փրկարարական վարչությունների պետերը զեկուցել են անցած շաբաթվա ընթացքում գրանցված ահազանգերի, ձեռնարկված միջոցառումների, անցկացված և նախապատրաստվող ուսումնավարժությունների, քաղաքացիական պաշտպանության հենակետերի, ինչպես նաև տրանսպորտային միջոցների տեխնիկական վիճակի մասին:
Պատասխանատուները փրկարար ծառայության տնօրենի ժամանակավոր պաշտոնակատար Վրեժ Գաբրիելյանին զեկուցել են հաշվետու ժամանակահատվածում իրականացված աշխատանքների վերաբերյալ:
Ի թիվս այլ հարցերի, Վրեժ Գաբրիելյանը նաև նկատել է, որ փրկարար ծառայության աշխատակիցներն արդեն ստացել են իրենց առաջին բարձրացված աշխատավարձը, որն ավելի պարտավորեցնող է:
Խորհրդակցության ավարտին փրկարար ծառայության տնօրենի պաշտոնակատար, փ/ծ գեներալ-մայոր Վ. Գաբրիելյանն ամփոփել է արդյունքները՝ տալով մի շարք հանձնարարություններ:
