Արսեն Թորոսյանը՝ շտապօգնության աշխատողների աշխատավարձերի մասին

«ՇՕ աշխատավարձի բարձրացում նախատեսված չէ, եթե գրված է, ուրեմն հին է: Սակայն մինչ այժմ աշխատանքային պայմանների բարելավում է եղել, ապահովագրություն է տրամադրվել, իջեցվել է աշխատանքային ծանրաբեռնվածությունը՝ ի հաշիվ բրիգադների ավելացման: 

Ընդհանուր առմամբ՝ աշխատավարձերի բարձրացումը պայմանավորված է նաև բուժաշխատողների ամսական հերթապահություններով: Մեծ հաճույքով կողմնակից եմ ՇՕ աշխատավարձերի բարձացմանը, սակայն խնդիրը հրատապ էր կանչերի սպասարկման պահին, քանի որ սպասարկող մեքենաները չէին բավարարում: Հիմա նման պատկեր չունենք». նոյեմբերի 1-ին 2020թ. պետբյուջեի նախագծի քննարկմանը հայտարարեց առողջապահության նախարար Արսեն Թորոսյանը՝ պատասխանելով «Իմ քայլից» պատգամավոր Արփինե Դավոյանի այն հարցին, թե կոնկրետ ո՞ր ժամկետում պետք է սպասել ՇՕ բուժանձնակազմի աշխատավարձի բարձրացումը: 

«Իմ քայլից» Նարեկ Զեյնալյանը պնդեց՝ այնուամենայնիվ, աշխատավարձը ՇՕ-ի ցածր է, և կարելի է բարձրացման համար միջոցներ գտնել, որովհետև բժիշկները հիվանդների ձեռքին են նայում: Նախարարն արձագանքեց. «Հաճույքով Ձեզ հետ կքննարկեմ աշխատավարձի հնարավոր բարձրացման ֆինանսական աղբյուրը: Բժիշկներն էլ հիմա այնքան չեն նայում հիվանդի ձեռքին»,- ասաց նա: Նախարարը հայտնեց նաև, որ առաջիկայում կանչերի դասակարգում կարվի, ոչ հրատապ կանչերը չեն սպասարկվի, նրանց կառաջարկվի հաջորդ օրն այցելել պոլիկլինիկա: Այժմ մի փորձնական ծրագիր է իրականացվում, որով կանչերը սպասարկում են ոչ թե ՇՕ-ի, այլ շրջիկ բժիշկները: 

Նշենք, որ 2020թ. պետբյուջեի նախագծի համաձայն՝ նախատեսվում է առողջապահությանը հատկացնել 109 միլիարդ դրամ՝ 2018թ. 89,6 միլիարդ դրամի դիմաց: Ըստ առողջապահության նախարար Ա.Թորոսյանի՝ այս տարվա հունիսին կառավարության որոշմամբ նախարարությանը հատկացվել է լրացուցիչ 12 միլիարդ դրամ: Այդպիսով՝ նախարարության բյուջեի աճը 2020թ. կկազմի 7,3 տոկոս:

27,1 միլիարդ դրամ ուղղվելու է առողջության պահպանման առաջնային օղակին, որը գերակա խնդիր է նախարարության համար: