Կասկած չկա, որ Ամուլսարի շահագործումը վատ ազդեցություն կունենա մարդկանց առողջության վրա. Վարզադատ Կարապետյան

«Իմ քայլը» խմբակցության անդամ Վարազդատ Կարապետյանն այսօր լրագրողների հետ զրույցում անդրադարձավ Ամուլսարի շահագործման խնդրին և Յուրա Իվանյանի նկատմամբ նշանակված ծառայողական քննությանը: Ըստ նրա՝ քննություն անցկացնելը ճիշտ որոշում է:

«Քանի որ ծառայողական քննություն է նախատեսված, եկեք սպասենք այդ ծառայողական քննության արդյունքներին: Ընդհանրապես ես կողմ եմ, որ  պրոֆեսիոնալ դաշտում հարցերը լուծվեն: Հիմա եթե ես իմ կարծիքն ասեմ՝ այո կամ ոչ, դրանից ոչ մի բան չի փոխվի: Պրոֆեսիոնալ դաշտում հարցը քննարկվում է, քննարկվում է նաև ՇՄԱԳ-ի հարցը Շրջակա միջավայրի նախարարությունում: Վաղը մենք կունենանք դրա վերաբերյալ նախարարության կարծիքը: Կոնկրետ ծառայողական քննության մասով նույնպես կսպասենք արդյունքներին»,- ասաց նա:

Կարապետյանը նշեց, որ կարդալով «Էլարդ» ընկերության ներկայացրած հաշվետվությունը, տեսել է բազմաթիվ խնդիրները, որոնք վեր հանվեցին նաև վարչապետի ներկայությամբ իրականացված տեսակոնֆերանսում, որը ցույց տվեց՝ հարցը ճիշտ հասկանալու համար բոլոր տեսանկյուններից է պետք նայել: Կառավարությունը հիմա այդ գործընթացում է:

«Իմ անձնական զգացողությունն այն է, որ  նոր ՇՄԱԳ-ը չի անցնի փորձաքննությունը՝ հաշվի առնելով գետերի ակունքները և այլն: Բայց այս հարցը ևս պետք է թողնենք պրոֆեսիոնալ դաշտի ընտրությանը»,-նշեց պատգամավորը:

Անդրադառնալով հանքի շահագործումից բխած վատ ազդեցություններին՝ պատգամավորն  ասաց՝ կասկած չկա, որ  հանքի շահագործումը շատ վատ ազդեցություն կունենա մարդկանց առողջության վրա: Բայց ինչպիսի ազդեցություն՝ էլի մասնագիտական հարց է: