Գյումրիի ավտոմաքսատանն աշխատելու համար մասնագիտական կադրերի ընտրության քննական փուլերը սկսված են

Բարձրագույն կրթություն, համակարգչային իմացութուն, հայերենի գերազանց և օտար լեզուների բավարար տիրապետում, սրանք առաջնահերթ պայմաններն են, որոնք պարտադիր են ավտոմաքսատանը՝ մաքսային տեսուչներ աշխատելու համար: 

Աշխատանքային փորձն առաջնային պահանջներից չէ, սա արդեն Պետեկամուտների կոմիտեի ուսումնական կենտրոնն է լրացնելու: Թափուր տեղերը համալրվելու են ոչ թե մրցութային, այլ վերապատրաստում-քննություն արագացված կարգով: Այս մասին SHANTNEWS.am-ին հայտնել է ՀՀ ՊԵԿ նախագահի տեղակալ Շուշանիկ Ներսիսյանը: 

Թե ինչ գործառույթներ են կատարելու մաքսային տեսուչները, Շուշանիկ Ներսիսյանը նշել է՝ աշխատանքը հիմնականում առնչվելու է փաստաթղթերի ձևակերպմանը, մեքենաների գրանցմանը, զննմանն ու բաց թողնմանը: Թափուր աշխատատեղերի համար նախապես հայտարարված նախապատրաստական դասընթացին 500-ից ավելի դիմումատուներ են հայտ ներկայացրել, մեծ մասը եղել է Շիրակի մարզից: Առաջին փուլը, որն օտար լեզուների իմացության ստուգմանն է վերաբերել, հաղթահարել է նրանցից 120-ը: 

Օտար լեզուների քննական փուլին հաջորդել են նեղ մասնագիտական դասընթացները: Երեք օրում յուրացրել են մաքսավորի աշխատանքի բուն գործառույթը, պարտականությունները: 
Քննական շրջանի երկրորդ փուլը տեսական գիտելիքների ստուգումն է, որին մասնակցում էին առաջին փուլը հաղթահարած 120 մասնակիցները: 30 հարցից բաղկացած 5 տարբերակների առաջադրանքները նեղ մասնագիտական հարցերի պատասխան են պահանջում: 

Տեսական քննությունը վերջնական փուլը չէ: Անցողիկ շեմը հաղթահարած 60 դիմորդները պրակտիկա կանցնեն մայրաքաղաքի ավտոմաքսատանը, որից հետո կտեղափոխվեն Գյումրի: 60 սկսնակ աշխատողների հետ սկզբնական շրջանում Գյումրիի ավտոմաքսատանը կաշխատեն 25 մասնագետներ՝ Նորագավթի մաքսատնից: 
Նոր ավտոմաքսատանը գործելու է նաև Ճանապարհային ոստիկանության ծառայություններից մեկը, այստեղ է լինելու տրանսպորտային միջոցների գրանցման  և հաշվառման կենտրոնը: Նոր աշխատատեղերի պահանջn այս կենտրոնը նույնպես լրացնելու է քննական կարգով: