Առժամանակ դադարեցվել է 4 գիշերօթիկի լուծարման գործընթացը

Աշխատանքի և սոցիալական հարցերի նախարարությունը հանրային քննարկման  էր ներկայացրել կառավարության որոշման մեջ փոփոխություն կատարելու նախագիծ, որով նախատեսվում է լուծարել ևս 4 գիշերօթիկ հաստատություն՝ «Դիլիջանի երեխաների խնամքի և պաշտպանության գիշերօթիկ հաստատությունը», «Բյուրեղավանի երեխաների խնամքի և պաշտպանության գիշերօթիկ հաստատությունը», «Գյումրու Ֆրիտյոֆ Նանսենի անվան երեխաների խնամքի և պաշտպանության N 2 գիշերօթիկ հաստատությունը», «Գյումրու երեխաների խնամքի և պաշտպանության  N 1 գիշերօթիկ հաստատությունը»:

Սակայն Tert.am-ի հարցման ի պատասխան` նախարարությունից տեղեկացրին, որ ՊՈԱԿ-ների  լուծարման վերաբերյալ նախագծերն առժամանակ դադարեցվել են՝ վստահ լինելու, որ հաստատություններում գտնվող յուրաքանչյուր երեխայի համար գտնված է լավագույն լուծումը:

«Երեխաների՝ ընտանիքում ապրելու իրավունքի իրացման ուղղությամբ քայլերը սկսվել են տարիներ առաջ, որի շրջանակներում գիշերօթիկ 7 հաստատություններից 3-ն արդեն իսկ վերակազմավորվել են ցերեկային խնամքի կենտրոնների: Այս ընթացքում նախարարությունը մշակել է երեխայի՝ ընտանիքում ապրելու իրավունքի իրացման համալիր միջոցառումների մշակման ծրագիր, որի շրջանակներում էլ ընթացք է տրվել գիշերօթիկ հաստատությունների լուծարման գործընթացին»,- ասված է հարցման պատասխանում:

Ըստ նախարարության՝ լուծարման պատրաստվող 4 գիշերօթիկ հաստատությունում իրականացվում է ընդհանուր առմամբ 260 երեխաների խնամք: