Չելյաբինսկում վթարից տուժած հայաստանցիները վերակենդանացման բաժանմունքում են
Օգոստոսի 28-ի երեկոյան Ռուսաստանի Չելյաբինսկի մարզում Հայաստանի բնակիչների մասնակցությամբ ճանապարհատրանսպորտային պատահար է տեղի ունեցել: Այս մասին հաղորդում է Rusarminfo-ն:
Հաղորդվում է, որ Մոսկվա-Չելյաբինսկ ավտոճանապարհի 1605 կմ-ին՝ Աշինսկի շրջանի տարածքում Hyundai Sonata մակնիշի մեքենայի 41-ամյա վարորդը փորձել է վազանց կատարել մայրուղու այն հատվածում, որտեղ դա արգելված է:
Մեքենան դուրս է եկել հանդիպակաց երթևեկության գոտի:
Հանդիպակաց երթևեկելի գոտի դուրս գալուց հետո ավտոմեքենան բախվել է Isuzu մակնիշի բեռնատարին, որի վարորդը Բաշկիրիայի 39-ամյա բնակիչ էր: Վթարի հետևանքով հայաստանցի վարորդը և ուղևորը վնասվածքներ են ստացել և տեղափոխվել հիվանդանոց:
ՌԴ-ում ՀՀ դեսպանության խորհրդական Էդվարդ Ջամբազյանը հայտնում է որ, վթարի հետևանքով տուժել է ՀՀ 2 քաղաքացի: Նրանք ուղևորվում էին Մոսկվա:
«Նրանք հիմա Աշինսկի հիվանդանոցում են՝ վերակենդանացման բաժանմունքում, բժիշկների գնահատմամբ՝ նրանց կյանքին վտանգ չի սպառնում: Հիմա քննարկվում է նրանցից մեկին Չելյաբինսկի հիվանդանոց տեղափոխելու նպատակահարմարությունը»,- ասաց Ջամբազյանը:
