Թուրքական քաղաքում պայթյուններ են տեղի ունեցել զենքի պահեստում
Սիրիայի հետ սահմանին գտնվող թուրքական Ռեյհանլը քաղաքում մի քանի պայթյուն է տեղի ունեցել զենքի պահեստում, հայտնում է թուրքական NTV հեռուստաալիքը:
Նախնական տվյալների համաձայն՝ զոհեր ու վիրավորներ չկան: Հարակից տների բնակիչները տարհանվել են: Պայթյունների պատճառը դեռ հայտնի չէ:
Ավելի վաղ Թուրքիայի նախագահ Ռեջեփ Թայիփ Էրդողանը հայտարարել էր, որ Անկարան Սիրիայի հյուսիսում՝ Եփրատ գետից արևելք ընկած հատվածում, ռազմական գործողություն կսկսի Սիրիայի քրդերի ինքնապաշտպանական ջոկատների դեմ: Նշվում է, որ գործողությունը կարող է սկսվել օգոստոսի 11-ից հետո:
