ՏԵՍԱՆՅՈՒԹ․ Տեսադաշտում ունենք անձինք, որոնց նկատմամբ օպերատիվ գործողություններ են իրականացվում. Օսիպյանը՝ Իջևանյան դեպքերի մասին
Իջևանում օրեր առաջ տեղի ունեցածը անկարգություն ու խուլիգանություն է։ Այս մասին, այսօր հրավիրված մամուլի ասուլիսին հայտնել է ոստիկանապետ Վալերի Օսիպյանը՝ հավելելով, որ իշխանության ներկայացուցչին դիմադրություն ցույց տալու հատկանիշներով է քրեական գործ հարուցվել։
«Մեր նպատակն է նրանց հայտնաբերել եւ օրենքի ամբողջ խստությամբ պատասխանատվության ենթարկել։ Այս պահի դրությամբ մենք ունենք բերման ենթարկված 29 անձ, ձերբակալվել էին 13-ը, 2 օր առաջ կալանավորվել են 10-ը։ Այդ ուղղությամբ աշխատանքները շարունակական են լինելու: Մենք ունենք ցանկ, թե ովքեր են ավելի ակտիվ դերակատարություն ունեցել այդ օրը, այդ թվում մարմնական վնասվածքներ են հասցրել ոստիկաններին»,- ասաց Օսիպյանը:
Ինչ վերաբերում է ապօրինի ծառահատումներին, ոստիկանապետը հայտարարեց, որ ոստիկանությունը սկզբունքային է լինելու, այլեւս թույլ չի տալու ապօրինի ծառահատումներ Իջեւանում եւ հանրապետության մնացած բոլոր տարածքներում։ Օսիպյանի խոսքով՝ իրենք ավելի սկզբունքային են լինելու այս հարցում, քանի որ անտառները ՀՀ հարստությունն են։
Դիտարկմանը, թե տեսակետ կա, որ ապօրինի ծառահատումների հետեւում կանգնած են օլիգարխներ, այլ ոչ թե իջեւանի ցուցարարները, Օսիպյանն արձագանքեց․ «Ոստիկանությունը համապատասխան աշխատանքներ է տանում, մենք տեսադաշտում ունենք անձինք, որոնց նկատմամբ օպերատիվ գործողություններ են իրականացվում։ Այս պահին անուններ չեմ տա՝ ելնելով գործի հանգամանքներից։ Մենք ունենք ենթադրյալ կասկածյալ, բայց պետք է հիմնավորումները հստակ լինեն, որ մենք հետագայում նախքաննության ժամանակ չունենանք այն խնդիրները, որոնք ունենում ենք երբեմն»:
Տեսանյութը՝ News.am-ի։
