ՌԴ Կրասնոդարի երկրամասի Նովոռոսիյսկ քաղաքի թիվ 1 քաղաքային հիվանդանոցի բժիշկ Արսեն Հայրապետյանին հաջողվել է իրականացնել հազվագյուտ գենետիկ հիվանդությամբ երեխայի վիրահատությունը, որից հրաժարվել էին արտասահմանցի բժիշկները: Այս մասին գրում է kp.ru-ն:

Նշվում է, որ 4-ամյա ռուս երեխայի մոտ ախտորոշվել էր  հազվագյուտ գենետիկ հիվանդություն՝ Մարշալի համախտանիշով (պարբերական տենդ):

Բժիշկները հրաժարվել էին հեռացնել Մարտինի նշագեղձերը, քանի որ վստահ չէին, որ վիրահատությունը կօգնի երեխային ազատվել տենդից:

«Արսեն Միքայելովիչը չորս տարվա մեջ մեզ հանդիպած միակ բժիշկն է, որն անմիջապես հայտնեց, որ կկատարի վիրահատությունը: Խնդիրը նույնիսկ ոչ թե բուն վիրահատությունն է, որը տևել է 30 րոպե, այլ այն վստահությունը, որով բժիշկը որոշեց օգնել մեզ: Հիվանդության դեմ պայքարի այս տարիների ընթացքում, ես երբևէ չեմ հանդիպել մի բժշկի, որն այդքան վստահ ու փաստարկված խոսի... Ես անսահման շնորհակալ եմ, նա Աստծո կողմից ուղարկված բժիշկ է»,- ասել է տղայի մայրը:

Նշվում է նաև, որ տղայի վիճակը վատացել էր այս տարվա հունվարին։ Տղան վիրահատվել է մայիսին։