Վրացական «Ռուսթավի 2» հեռուստաընկերության շենքի մոտ արդեն երկրորդ օրն է՝ բողոքի ցույց  է ընթանում, որի պատճառը «P.S.» հեղինակային ծրագրի հեռուստահաղորդավար Գեորգի Գաբունիայի՝ երեկ հաղորդման սկզբին Ռուսաստանի նախագահ Վլադիմիր Պուտինի հասցեին հնչեցրած հայհոյանքներն են, գրում է РИА Новости-ն:

Մեծ թվով օգտատերեր քննադատել են Գաբունիային և մտավախություն հայտնել, որ վրաց-ռուսական հարաբերությունները կարող են է՛լ ավելի սրվել: Հեռուստաընկերության գլխավոր տնօրեն Նիկա Գվարամիան հայտարարել է, որ անթույլատրելի է համարում հայհոյանքը եթերում, թեև կիսում է հեռուստահաղորդավարի կարծիքը:

Վրաստանի երրորդ նախագահ Միխեիլ Սաակաշվիլին իր հերթին ֆեյսբուքյան էջի միջոցով հայտարարել է, որ դեմ է հիստերիային և էպիտաժին, և որ իրականությանը պետք է «քաղաքակիրթ ձև» հաղորդել, սակայն ավելի ուշ ջնջել է գրառումը: