Ծրագրված ապստամբություն. Վրաստանի գլխավոր դատախազության որակումըՙ թբիլիսյան ցույցերին
Վրաստանի գլխավոր դատախազությունը հայտնել է, որ մայրաքաղաք Թբիլիսիում հունիսի 20-ի լույս 21-ի գիշերը տեղի ունեցած բողոքի ցույցերը տեղի բնակիչների շրջանում ծագած պատահական վրդովմունք չեն եղել, այլ ծրագրված ապստամբություն, որը նպատակ է ունեցել իշխանությունը զավթելու: Այս մասին ասված է գերատեսչության պաշտոնական կայքում:
«Այս փուլում հավելյալ գործողությունների, ստացված հանցանշանների և տասնյակ վկայությունների հիման վրա քննչական մարմինը եկել է այն եզրակացությանը, որ հունիսի 20-ի լույս 21-ի գիշերն առանձին անձինք ծրագրել են խռովության ճանապարհով բռնի կերպով տապալել պետական իշխանությունը և զավթել այն»,- նշվում է դատախազության հայտարարության մեջ:
Խորհրդարանի շենք ներխուժելու փորձը խռովարարների ծրագրի միայն մի մասն է եղել, իսկ հաջորդ փուլը պետք է շրջաններում իրադրության ապակայունացումը լիներ:
Հիշեցնենք, որ վրացիների զանգվածային բողոքի ցույցերը մեկնարկել էին հունիսի 20-ին՝ ՌԴ պետդումայի պատգամավոր Սերգեյ Գավրիլովի ելույթի պատճառով, որը ներկա էր եղել Վրաստանում անցկացվող Ուղղափառության միջխորհրդարանական վեհաժողովի նիստին: Նիստի մեկնարկից հետո նա նստել էր խորհրդարանի խոսնակի աթոռին և հավաքվածներին ռուսերենով ուղերձ հղել:
Հունիսի 20-ի գիշերը ցուցարարները փորձել էին գրոհել խորհրդարանի շենքը, որից հետո նրանց դեմ ռետինե փամփուշտներ և արցունքաբեր գազ էր կիրառվել, ինչի հետևանքով 240 մարդ տուժել էր: Բախումներից հետո 305 մարդ բերման էր ենթարկվել:
