ՏԵՍԱՆՅՈՒԹ. Ինչպես կկարգավորվի «Կարմիր գծերում» վարձով տրվող մեքենաների կայանման խնդիրը

Երևանի Բաղրամյան պողոտայի և այլ հատվածների վճարովի կայանատեղերում կամ, այսպես կոչված, կարմիր գծերում կարելի է տեսնել վարձակալությամբ տրվող մեքենաների շարասյուներ, որոնք շուրջօրյա զբաղեցնում են կայանման տարածքները՝ խոչընդոտելով այլ մեքենաների կայանմանը, գրում է Tert am-ը։ Վճարովի կայանատեղերում վարձակալությամբ տրվող մեքենաներ կարելի է տեսնել նաև Կոմիտասի պողոտայում, Աբովյան փողոցի տարբեր հատվածներում, նույնիսկ Հանրապետության հրապարակի տարածքում: Tert. am-ը գրավոր հարցում էր ուղարկել Երևանի քաղաքապետարան՝ հարցադրումներով, թե ինչո՞ւ են վարձով մեքենաներ տրամադրող ընկերության մեքենաները կայանման տարածքը շուրջօրյա զբաղեցնում և իրավունք ունի՞ որևէ ընկերությունը մշտապես զբաղեցնել համայնքին պատկանող տարածքը: Քաղաքապետարանից, մասնավորապես, պատասխանել են. «Կայանման համար թույլատրելի ճանապարհահատվածներում և գործող վճարովի կայանատեղերում (կարմիր գծեր) «տրվում է վարձով» և այլ գրառմամբ տրանսպորտային միջոցների կայանման վերաբերյալ տեղեկացնում ենք, որ գործող իրավական ակտերով որևէ իրավական նորմ չկա, որով հնարավոր կլիներ արգելել կամ սահմանափակել երթևեկության կանոնների համաձայն և կայանում կատարելու համար համապատասխան վճարումներ ունեցող տրանսպորտային միջոցների կայանումը, ուստի որևէ հիմք չկա նաև՝ քաղաքապետարանի կողմից թույլտվություն տալու կամ չտալու համար»: Քաղաքապետարանից միաժամանակ հայտնում են, որ «տրվում է վարձով» և այլ գրառմամբ կայանված ավտոմեքենաների նկատմամբ անհրաժեշտ միջոցներ կիրառելու համար այժմ ոստիկանության հետ համատեղ քննարկվում է իրավական հիմքեր ստեղծելու հնարավորությունը: Սակայն, և՛ քաղաքապետարանից, և՛ ոստիկանությունից հրաժարվեցին լրացուցիչ տեղեկություն տրամադրել, թե ինչ նախագծի մասին է խոսքը: Մանրամասները՝ Tert am-ի տեսանյութում: