Ադրբեջանից համապատասխան բացատրություն կպահանջեն․ Աննա Նաղդալյան
Մասիս Մայիլյանն իր տեսակետը հայտնել է որպես Արցախի ներկայացուցիչ, իսկ Արցախն ինքնուրույն քաղաքական միավոր է, որն ունի իր կողմից ընտրված իշխանություն, իր տեսակետները: Այս մասին այսօր լրագրողների հետ զրույցում ասաց ՀՀ ԱԳՆ մամլո խոսնակ Աննա Նաղդալյանը՝ մեկնաբանելով նախօրեին Արցախի արտգործնախարար Մայիլյանի հայտարարությունը, որ ժամանակն է հրաժարվել Մադրիդյան սկզբունքներից:
Նաղդալյանը նշեց, որ այս հարցի շուրջ Հայաստանի և Արցախի միջև հակասություն չկա: «Մենք մշտապես համագործակցում ենք Արցախյան գործընկերների հետ, սա կարելի է hամարել դրանցից մեկը: Սա, ինչպես ասել է Մնացականյանը, այն հարցերի շրջանակում է, երբ մշտական երկխոսության մեջ ենք նաև Արցախի հետ»,- նկատեց ԱԳՆ խոսնակը:
Խոսելով Ադրբեջանում մարտի 11-15-ն անցկացված լայնամասշտաբ զորավարժությունների մասին՝ Աննա Նաղդալյանը նշեց. «Ադրբեջանի կողմից առանց համապատասխան ծանուցման հարձակողական բնույթի լայնամասշտաբ զորավարժությունների իրականացումը ԵԱՀԿ գործիքակազմով նախատեսված միջազգային պարտավորությունների խախտում է և այն որևէ ձև չի նպաստում տարածաշրջանում վստահության մթնոլորտի ամրապնդմանը: ԵԱՀԿ-ում մեր ներկայացուցչությունն այս հարցը բարձրաձայնել է ԵԱՀԿ շրջանակներում և Ադրբեջանից համապատասխան բացատրություն պահանջել: Ե՛վ Արցախը, և՛ Հայաստանն ունեն վճռականություն ու կարողություն՝ պաշտպանվելու և հակահարված հասցնելու. այս հարցը որևէ մեկը թող դա կասկածի տակ չդնի: Այդ վճռականությամբ է պայմանավորված նաև մեր հանձնառությունը՝ քայլեր ձեռնարկելու խաղաղության հաստատման ուղղությամբ»:
