Միքայել Մինասյանը 7 մլն դոլարով վաճառքի է հանել իրեն պատկանող հյուրանոցը․ Irakanum.am
Բաղրամյան փողոցում գործող «Օպերա Սյութ» հյուրանոցային համալիրը հանվել է վաճառքի։ Այս մասին հայտնում է Irakanum. am-ը՝ հղում անելով իր ունեցած հավաստի տեղեկություններով։
Նախնական գին սահմանվել է 7 միլիոն դոլար։ Լրատվականի փոխանցմամբ՝ տեղեկությունների համաձայն հյուրանոցային համալիրը պատկանում է Վատիկանում ՀՀ նախկին դեսպան Միքայել Մինասյանին։ Հյուրանոցային համալիրը վաճառելու մտադրություն Մինասյանը ունեցել է դեռեւս հեղափոխությունից անմիջապես հետո, սակայն գնորդներ չեն եղել։ Հիմա, սակայն հյուրանոցային համալիրով հետաքրքրվողներ կան եւ առեւտրային գործարքի շուրջ պայմանավորվածություններ են ընթանում։ Գնորդը Հայաստանից է լինելու։
Լրատվամիջոցը ընդգծում է նաև, որ Միքայել Մինասյանին պատկանող հյուրանոցային համալիրում բար- սրճարան ունի նաեւ ՀՀ նախկին արտգործնախարար Վարդան Օսկանյանի որդին՝ Արման Օսկանյանը։ Խոսքը «Forty Four Sky» բարի մասին է։
Հիշեցնենք, որ օրեր առաջ ապամոնտաժվեց նաեւ Օպերայի տարածքում գործող «Ջազզվե» սրճարանը, որը եւս կապվում է Միքայել Մինասյանի անվան հետ։
