Փաշինյանը հանդես է եկել հայտարարությամբ

Թույլ չենք տալու, որ երաշխավորները մեզ օգտագործեն ու դեն շպրտեն, մեզ օգտագործել են ուրիշների դեմ: Այս մասին քարոզարշավի ժամանակ ասել է Նիկոլ Փաշինյանը:

«Այսօր կան քաղաքական ուժեր, ովքեր ասում են, որ մենք պետք է երաշխավորներ ունենանք, երաշխավորների թեման մեզ համար իրականում շատ զգայուն թեմա է, որովհետև երբեմն մենք մոռանում ենք, որ այդպիսի ռեժիմում ապրել ենք, երբ մենք ունեինք պարտադիր իրավական ուժ ունեցող պայմանագրային բազա, երբ ունեինք անվտանգության երաշխավորներ, ովքեր պետք է պահեն մեր անվտանգությունը, բայց այդ անվտանգության երաշխավորներից մեկը՝ Բելառուսի նախագահը, պաշտոնական այցով Բաքվում գտնվելու ժամանակ շատ բաց և թափանցիկ հայտարարություն արեց, որ ինքը մասնակցել է 44-օրյա պատերազմի նախապատրաստական աշխատանքներին:

Այդ մարդը մեր անվտանգության երաշխավորներից մեկն էր, հավաքական անվտանգության պայմանագրի կազմակերպության անդամ: Մենք ասում ենք, որ ի վերջո պետք է հաղթահարենք այն ցիկլը, երբ թույլ ենք տալիս, որ ուրիշները մեզ օգտագործեն ուրիշների դեմ և դեն շպրտեն։ Մեր պատմության մեջ սա դարձել է մի խայտառակ ցիկլ, սա է ամենակարևոր քաղաքական փոփոխությունը, որ մենք արձանագրել ենք՝ թույլ չենք տալու այլևս, որ ուրիշները մեզ օգտագործեն ուրիշների դեմ և դեն շպրտեն։ Այստեղ անհարգալից ոչ մի բան չկա որևէ երկրի և որևէ սուբյեկտի նկատմամբ: Հայաստանի Հանրապետությունը միջազգային ասպարեզում ավելի հեղինակավոր է, քան երբևէ»,- նշել է Նիկոլ Փաշինյանը: