Հունաստանի կոպիտ արձագանքը՝ Թուրքիայի ընդունած նոր օրենքին

Հունաստանն արձագանքել է Թուրքիայի կառավարության կողմից մշակվող «Թուրքական ծովային օրենքի» նախագծին, որով նախատեսվում է օրենսդրորեն ամրագրել Թուրքիայի ծովային սահմանները Սև, Միջերկրական և Էգեյան ծովերում, գրում է ermenihaber.am-ը:

Հունաստանի արտգործնախարար Յորգոս Գերապետրիտիսը հայտարարել է, որ միջազգային իրավունքի շրջանակում բազմակողմ կամ երկկողմ համաձայնություն պահանջող հարցերում միակողմ քայլերը չեն կարող միջազգային ուժ ունենալ։ Նա ընդգծել է, որ Աթենքը կարող է «տարբեր ձևերով արձագանքել» նման նախաձեռնություններին։

Հունաստանի պաշտպանության նախարար Նիկոս Դենդիասն էլ մեղադրել է Թուրքիային «ռևիզիոնիստական նպատակներ» (վերանայող և աղավաղող գաղափարական-քաղաքական հոսանք) հետապնդելու մեջ՝ շեշտելով, որ բոլոր հունական կղզիներն ունեն ՄԱԿ-ի ծովային իրավունքի կոնվենցիայով նախատեսված իրավունքները։

Միևնույն ժամանակ Թուրքական կողմն էլ հայտարարում է, որ օրենքի նպատակը երկրի ծովային իրավասությունների հստակեցումն ու ներքին օրենսդրական բացերի լրացումն է։ 

Թուրքիայի Պաշտպանության նախարարությունն էլ ընդգծել է, որ զինված ուժերը շարունակելու են պաշտպանել երկրի իրավունքներն ու շահերը ծովային գոտիներում։