Անվճար վիրահատություններ և դեղեր․ Փաշինյանը՝ առողջապահական ծրագրի մասին

Հայաստանում մայիսի 1-ի դրությամբ Առողջության համընդհանուր ապահովագրության շրջանակում անվճար կատարվել է 500-ից ավելի՝ յուրաքանչյուրը 4 միլիոն դրամը գերազանցող վիրահատություն։ Այս մասին Երևանի Կենտրոն վարչական շրջանում ընթացող նախընտրական քարոզարշավի ընթացքում հայտարարել է արձակուրդում գտնվող Հայաստանի վարչապետ, «Քաղաքացիական պայմանագիր» կուսակցության վարչապետ Նիկոլ Փաշինյանը։

«Չի եղել մի բնակավայր, որտեղ մենք կոնկրետ մարդկանց չհանդիպենք, որ արդեն իսկ առողջության ապահովագրությունից օգտվել է և այնպիսի վիրահատություններ է տարել, որոնք արժեն 2, 3, 4 մլն դրամ։ Մայիսի 1-ի դրությամբ՝ Հայաստանում 500-ից ավելի մարդ պետական բյուջեի հաշվին վիրահատվել է, և դրանք այնպիսի վիրահատություններ են, որոնք արժեն 4 մլն դրամ և ավելի։ Հազարավորները 1 մլն դրամից ավելի վիրահատություններ են տարել, տասնյակ հազարավորները 500 հազար դրամից ավելի վիրահատություններ են տարել։ Էլի տասնյակ հազարավորները մինչև 50 հազար դրամի ծառայություններ են ստացել»,- ասել է Փաշինյանը։

Նիկոլ Փաշինյանը հավելել է՝ այս թվում այն մարդիկ են, որոնք քրոնիկ հիվանդություններ ունեն ու անվճար դեղեր են ստանում պետական բյուջեից։

«Նրանք նախկինում այդ դեղերը գնում էին իրենց թոշակով»,- նշել է  Նիկոլ Փաշինյանը։