Իրանը նախազգուշացնում է․ ռազմական հարվածներ կհասցվեն

Իրանի իշխանությունները Հորմուզի նեղուցով նավագնացության կարգավորման նոր մեխանիզմ են մշակել։ Ինչպես հաղորդում է «ՏԱՍՍ» գործակալությունը, Թեհրանը հատուկ երթուղի է նախապատրաստել, որով անցնելու հնարավորություն կունենան բացառապես իսլամական հանրապետության հետ գործակցող պետությունները։ Նախաձեռնության մանրամասները պաշտոնապես կհրապարակվեն մոտ ժամանակներս։

Իրանի խորհրդարանի ազգային անվտանգության կոմիտեի ղեկավար Էբրահիմ Ազիզիի խոսքով՝ այս քայլն իրականացվում է պետական սուվերենության և միջազգային առևտրի անվտանգության ապահովման շրջանակներում։ Պատգամավորը նշել է, որ սահմանված հատուկ ուղիով կարող են անցնել միայն առևտրային նավերն ու Թեհրանի գործընկեր երկրները, իսկ մատուցվող մասնագիտացված ծառայությունների համար վճար է գանձվելու։

Միևնույն ժամանակ, նոր կանոններով տարանցման իրավունքից կզրկվեն ԱՄՆ-ի կողմից իրականացվող «Project Freedom» գործողության մասնակիցները։ Իրանական կողմը նախազգուշացրել է, որ ջրային տարածքն առանց համաձայնեցման հատելու փորձերը կկանխվեն ռազմական հարվածներով։ Բացի այդ, խորհրդարանական հանձնաժողովի նախագահն ընդգծել է, որ նավագնացության կարգավորման հարցում ԱՄՆ ցանկացած միջամտություն կդիտարկվի որպես հրադադարի ռեժիմի խախտում։