Երևանում քանդվել է պատմական նշանակության ևս մեկ շենք

Վերջին ժամանակներս բոլորս հիմնականում ուշադրություն ենք դարձնում մեր երկրում քաղաքական տարբեր զարգացումներին, բողոքի ակցիաներին, տնտեսական վերլուծություններին, եղանակին եւ նման այլ զանազան թեմաների: Ու պարզվում է, որ մի քանի օր առաջ Երևանում քանդվել է պատմական նշանակության ևս մեկ շենք: Լուսանկարները իր ՖԲ էջում հրապարակել է Artak Ghulyan-ը: Շինությունը գտնվել է Շահումյան հրապարակի և Շիրակ հյուրանոցի միջև, Խորենացի 13 հասցեում: ՖԲ քննարկումներից կարողացանք պարզել նաեւ, որ քանդված շենքը՝ Բարձրագույն կրթության և միջնակարգ մասնագիտական կրթության նախկին շենքն է եղել: Ըստ ՖԲ օգտատերերի գրառումների, շենքը քանդվել է 15 տարի առաջ, բայց շենքի ճակատային մասը պահպանել էին պետության պահանջով։ Հիմա դա է քանդվում։ Երեւանի քաղաքապետարանը պարզաբանում ներկայացրել է, թե քանդված շենքի տեղում ինչ է լինելու: Պարզաբանումը ներկայացնում ենք ամբողջությամբ: Ներկայացնում ենք նաեւ արդեն նախկին շենքի եւ դրա տեղում կառուցվող նոր շինության լուսանկարները: «Պարզաբանում. Խորենացու փողոցի 13 շենքի ճակատը վերականգնվելու է նոր մոտեցմամբ Խորենացու փողոցի 13 հասցեում, «Շիրակե հյուրանոցի հարևանությամբ գտնվող շենքն ապամոնտաժվել է դեռևս 2004թ.-ին, որի ժամանակ պահպանվել է միայն դիմային հատվածը: Ի սկզբանե, 2004թ.-ին շենքը մասնավորեցվելուց հետո, սեփականատերերն իրենց ներկայացված նախագծերով չեն նախատեսել ճակատային հատվածի պահպանում: Շինությունը հուշարձան շենք չէ, ինչպես նաև ներառված չէ Երևան քաղաքի՝ ճարտարապետական տեսակետից արժեքավոր ճակատներ ունեցող շենքերի կազմում: 2017թ. հողամասը ձեռք է բերել «Արմսվիս Փրոփերտիսե ՓԲԸ-ն, որը դիմել է Երևանի քաղաքապետարան՝ շենքի կիսաքանդ ճակատային հատվածը ապամոնտաժելու և տեղում ստորգետնյա հարկերով բիզնես կենտրոն կառուցելու նպատակով: Ներկա պահին ապամոնտաժման աշխատանքներն իրականացվում են համաձայն նախագծի և 08.02.2019թ.-ին տրամադրված քանդման թույլտվության հիման վրա: Ի դեպ, ընկերության կողմից ներկայացված բիզնես կենտրոնի կառուցման էսքիզային առաջարկով խնդրո առարկա ճակատը նոր մոտեցմամբ վերականգնվելու է՝ դառնալով համալիրի ինտերիերի բաղկացուցիչ մասը: Հարկ է նշել, որ տասնյակ տարիների ընթացքում տեղումների հետևանքով շենքի ճակատային հատվածը խարխլվել է: Կից ներկայացվում են բիզնես կենտրոնի էսքիզային տարբերակները»: