Իրանը կարող է վերանայել միջուկային դոկտրինը

Իրանի իշխանությունները կարող են մի շարք տարբերակներ քննարկել՝ ի պատասխան Միացյալ Նահանգների կողմից եկող լայնածավալ ռազմական սպառնալիքի, այդ թվում՝ վերանայել երկրի միջուկային դոկտրինը։ Այդ մասին հայտարարել է Մեջլիսի ազգային անվտանգության և արտաքին քաղաքականության հանձնաժողովի խոսնակ Էբրահիմ Ռեզաին։

«Մի պատասխան կարող է լինել Իրանի դուրս գալը Միջուկային զենքի չտարածման մասին պայմանագրից (NPT)», - հայտարարել է Ռեզաին։

Նրա խոսքով՝ Թեհրանը կարող է նաև «քննարկել իր միջուկային դոկտրինը փոխելու հարցը, եթե սպառնալիք նկատի Իսլամական Հանրապետության գոյությանը»։

Ռեզաին նաև հայտարարել է, որ Իրանը տարածաշրջանում վերջերս տեղի ունեցած պատերազմի ընթացքում «չի օգտագործել իր բազմաթիվ հնարավորությունները»։ Նա հավելել է, որ Թրամփին աջակցող Պարսից ծոցի երկրները» պետք է մտահոգվեն իրենց նավթի և գազի հանքավայրերի համար։